Un jutori impuartant pal recupar dal patrimoni culturâl

Pal 2021 a son a disposizion 600 mil euros de Fondazione Friuli par restaurâ il patrimoni culturâl dal teritori furlan. La Fondazione Friuli e à confermât ancje par chest an i 600 mil euros destinâts al bant “Restaur” dedicât ae conservazion e ae valorizazion dal patrimoni culturâl, cul obietîf di no lassâ disfurnîts i setôrs da la art, de architeture e de storie furlane. Ancje in chest câs, come che al è stât pes primis trê edizions dal bant, la iniziative e pues contâ su la colaborazion de Regjon e su la poie di Intesa San Paolo. «O lin indenant – al à spiegât Giuseppe Morandini, president di Fondazione Friuli, intant de presentazion vie internet – cuntun bant che in trê agns nus à permetût di intervignî in cuasi ducj i Comuns dai teritoris des ex provinciis di Udin e Pordenon. In chest prin periodi si à rivât, simpri cu la poie de Regjon e di Banca Intesa, a recuperâ ben 13 centris di agregazion». Ta chescj agns, in graciis dal bant di Fondazione Friuli, si è intervignûts par recuperâ afrescs, cuadris, manuscrits, sculturis, standarts, zardins storics e fintremai peliculis di epoche, ma ancje lant a ristruturâ edificis di destinâ a centris di agregazions, par no dismenteâ lis tantis piçulis glesiis di paîs, come che à ricuardât Simonetta Bonomi de Sorintendence regjonâl, intant de presentazion. «Al è un jutori impuartant a dute la economie regjonâl – e à dit la assessore regjonâl pe culture Tiziana Gibelli – dulà che la Regjon si è concentrade di une bande cui ristôrs, di chê altre cun progjets di ripartence destinâts a sogjets culturâi e sportîfs, che i bants a saltaran fûr tes prossimis setemanis –. Un altri intervent fondamentâl al è chel di Art Bonus Fvg, che za tal 2020 al à vût risultâts une vore impuartants: chest an si spietìn un numar plui alt di domandis in graciis dal inseriment des fondazions bancjariis, che a podaran beneficiâ dal credit di impueste». Il bant al è indreçât a istituzions e ents publics, ents religjôs, parochiis, fondazions e associazions cence fin di vuadagn: pal recupar di centris di agregazions a valin ancje lis associazions iscritis tal regjistri regjonâl dal volontariât, Aps e Onlus. Lis domandis a son di presentâ dentri dai 3 di Mai: «Soredut in chest moment dificil – al à dit Renzo Simonato di Intesa Sanpaolo – il patrimoni culturâl e artistic al à un valôr strategjic par rilançâ il paîs, creant valôr pe coletivitât, coesion sociâl e valorizazion des tradizions». ❚