Il primât di civiltât de Scozie e la poie de Gjermanie al Minority SafePack

Une iniziative politiche di civiltât che e devente ancje une sorte di messaç promozionâl a nivel internazionâl pe Scozie, pal so autoguvier di cumò e pes sôs prospetivis e rivendicazions di indipendence. Ai 24 di Novembar stâts il Parlament scozês al à fat bon ae unanimitât il “Period Products (Free Provision) Scotland Act”, la leç che e previôt par dutis lis feminis la disponibilitât sore nuie dai assorbents intims. L’intindiment al è chel di fâi cuintri a chê che e ven clamade “period poverty” (la puaretât dal cicli mestruâl), ven a dî il fat che in tantis di lôr a àn di fâ di mancul di comprâ i assorbents par vie dal redit bas. L’invistiment al è di sù par jù dîs milions di euros ad an, distribuîts tra ents locâi, scuelis, universitâts, associazions di volontariât e sportivis, circui culturâi e centris pai zovins par che a vegnin dâts fûr chei prodots a cui che ju domande.
◆ La Scozie e je il prin puest in dut il mont là che e ven inviade une politiche di cheste fate. Lu à marcât cun sodisfazion la premier scozese, Nicola Sturgeon, che su Twitter e à palesât la sô braùre propit parcè che e je «une politiche impuartante pes feminis e pes fantatis».
◆ Za doi agns indaûr, i scozês a vevin fat un prin pas (e a vevin jonzût un prin primât) in chest cjamp, cu la distribuzion sore nuie dai assorbents tes scuelis e tes universitâts, par fâi cuintri a chê che e vignive calcolade une vere emergjence, stant che sù par jù  il 10% des studentis no levin a scuele intai dîs dal cicli mestruâl propit par vie che no vevin la pussibilitât di comprâ i assorbents.
◆ Si stime che chel stes probleme al esisti un pôc dapardut, salacor ancje cun percentuâls plui altis: une cuistion in chel istès economiche e culturâl, stant che chel des mestruazions in tantis fameis al è ancjemò un argoment tabù. Ator pe Europe i assorbents intims si pain e in cualchi puest ancje avonde cjârs: par esempli intal Stât talian, là che par chescj prodots la alicuote de impueste di valôr zontât e je dal 22%, compagn che pes machinis e pes televisions, intant che in Gjermanie e je dal 7%, tal Stât francês e je dal 5,5% e inte Republiche di Irlande no esist par nuie.
◆ Un altri parlament che in Europe, intes setemanis passadis, al à fat buine ae unanimitât une iniziative impuartante, al è il Bundestag todesc. Ai 27 di Novembar stâts ducj i rapresentants dai citadins de Gjermanie a son stâts in cunvigne pe aprovazion di une risoluzion che e sburte la Comission Europeane (CE), il Parlament European (PE) e il Consei de Union Europeane (UE) a cjapâ sù e a puartâ indenant il Minority SafePack, il “pacut” di normis di tutele des minorancis promovût de FUEN, la Union Federâl des Nazionalitâts de Europe, e presentât midiant de Iniziative dai Citadins Europeans (ICE) di passe un milion di lôr par che al deventi il contignût di un at juridic specific.
◆ E je la prime volte che il parlament di un stât membri de UE al fâs bon un document di cheste fate. Al è stât sometût ae atenzion di dute la Aule di Berlin de bande dai doi grups plui numerôs, chei de Cdu/Csu e dal Spd, e al à cjatât la poie di ducj chei altris: Verts, Çampe (la Linke) e Liberâi. Il president de FUEN, l’eurodeputât dal Ppe Loránt Vincze, ongjarês di Romanie, al à palesât la sô sodisfazion pe risoluzion dal Bundestag, che e à par sigûr un valôr simbolic e politic. Cumò la bale e torne tal cjamp di Strasburc e di Bruxelles: dopo de audizion fate ai 15 di Otubar stâts, il PE al varès di fâ buine in curt une sô risoluzion a pro dal Minority SafePack. ❚