Cressi a Milan fin di picinins e mantignî dut câs un leam fuarton cul Friûl.
◆ E je la storie di tancj fîs di emigrâts furlans te citât meneghine, e Antonio Cosmacini al è un esempli perfet.
◆ «Ma jo o soi nassût a Gurize!» al ten a marcâ «E ancjemò o soi resident, a Cormons» di dulà che vegnin i siei gjenitôrs. Antonio al à vût la fortune, peraulis sôs, di jessi nassût in Friûl parcè che i siei, che a erin za a stâ a Milan, si cjatavin in feriis «a cjase».
◆ Dopo di chê fortune Antonio, che cumò al à cincuante agns, al à passât la vite a Milan, ma simpri cul cûr ancje in Friûl. «Gno pari di piçul mi puartave ai events dal Fogolâr di Milan, ai timps che al jere Ardito Desio president.»
Une volte cressût, la passion pal Friûl al à tacât a seguîle bessôl «Cuant che o jeri universitari o levi aes trasfiertis dal Udin di bessôl, in tren. E cussì o ai cognossût i fantats dal Nucleo Milano, un biel trop di zovins furlans che a jerin a stâ o nassûts a Milan».
◆ Ma la passion no si è fermade al balon: Antonio al è stât fra i fondadôrs de associazion FAF-Fantats Furlans. Un trop di zovins che a forin i prins a fâ maiutis par furlan e che cualchidun si visarà che a produserin i libretuts clamâts Fregul cul formât dai Millelire che a levin tant in chei timps. Trops agns sono aromai? «O vin fat la fieste dai 20 agns intal 2016! Cumò però no sin plui atîfs.»
Cumò al à metût sù famee, al à doi fîs che no ur à fat mancjâ nancje a lôr il leam cu la Patrie «Ogni an une part di feriis lis fasìn a Grau, clâr! Ancje se no vignìn plui tant dispès a Cormons come cuant che e jere la none».
◆ Ancje se si impromet di dedicâ plui timp al Friûl, prin o dopo, di fat prime di saludâsi Antonio mi dîs «I ten a marcâ che tal imprin il FAF si clamave FAF-Fuarce Autonomiste Furlane. Plui in là, cuant che o varai plui timp bisugnarà tornâ a cjapâ sù chel discors».
◆ Benon, Toni, alore ti spietìn par tirâ sù i destins de Patrie. ❚
Dree Venier
