CE SUCEDEVIAL IN CHÊ VOLTE TAL MONT? La corone imperiâl di simpri peade al Friûl

Inte nestre ricognizion gjeopolitiche no vin ancjemò cjapât in considerazion la corone Imperiâl. E jere nassude di chê antighe semence poiade di Carli il Grant, inte famose gnot di Nadâl dal 800. Inte organizazion dai teritoris, l’antîc ducât Langobart dal Friûl al sarès deventât tiere di marche (di confin), rezude di un marchês. Tant che Everart, il plui grant di ducj. E po dopo si jere svilupade cul Reich dai Otons di Sassonie, che a fondarin il Sacri Roman Imperi Gjermanic intal 962, prins a meti insiemi, intes mans di une stesse persone, il podê di un vescul e chel di un grant feudatari, propit come intal câs dal Patriarcje di Aquilee e dal so “zimul”, il vescul di Bamberghe, che al dominave su dute la Valcjanâl. Come che par fortune aromai ducj a san, al fo un Imperadôr, Indrì IV di Baviere, a meti la sô firme sot dal diplome che al fondave la nassite de Patrie dal Friûl, ai 3 di Avrîl dal 1077. La vite dal Patriarcjât duncje e je simpri stade peade al destin imperiâl, e a chel des grandis fameis gjermanichis che di volte in volte a vignivin clamadis a rezilu. La plui impuartante di dutis e sarà di sigûr chê dai Lussemburc, cul so straordenari rapresentant Carli IV, progjetist de citât di Praghe e ancje di chê di Cividât: intal so pinsîr, in miniature, al varès vût di jessi la sô copie, intersezion di frontieris, lenghis e culturis diferentis, il Friûl tant che la Boemie.
◆ Une famee che e varès fat jessî fûr nons di Patriarcjis impuartants, tant che Nicolau di Lussemburc (1350-1358), fradilastri dal Imperadôr, che al dovè meti ordin dopo dal maçalizi di Bertrant di Saint Geniès. Intal 1433 al deventarà Imperadôr simpri un di chê stesse famee, Sigjismont, fi di Carli IV, chel stes che cul titul di re di Ongjarie al veve judât l’ultin Patriarcje di Aquilee in temporalibus, Ludovì di Teck, a oponisi cun grande fuarce a Vignesie. Il teritori imperiâl al jere imponent, al cjapave dentri lis tieris gjermanichis, lis regjons de Austrie cun Viene, la Boemie cun Praghe, e al imponeve la sô supremazie feudâl ancje ae Slovenie, ae Ongjarie e ae Cravuazie. Sot de corone imperiâl si fevelavin lenghis todescjis, slavis e romanzis. Difensôr de fede, l’Imperadôr al leve indenant a combati cuintri dai Turcs, i siei plui grancj nemîs. Ma ancje cuintri Vignesie, che dal 1420 e deventarà la sô spine tal flanc propit pai interès comuns su la linie dal confin che e partive dal Friûl e e coreve jù fin ae Dalmazie meridionâl. Art, culture, bancjis, marcjadants a jerin la linfe dal Imperi. Dongje des grandis regjons contadinis (la campagne boeme, la Slavonie, la Slovenie) a cressevin in potence e bielece lis citâts, zoiis tant che Praghe, Lubiane, Viene, Zagabrie, che a tacavin ancje a rivendicâ une cierte autonomie di aministrazion. Bisugne spietâ il principi dal secul XVI parcè che une famee si imponès su dutis chês altris: chei Asburcs che in curt a tornaran a jessi fondamentâi pe storie de nestre int. ❚