CE CHE O VIN PIERDÛT. I trê feuts scjampâts al control de Serenissime

Il Patriarcje al mantignì il control su Aquilee,
San Vît e San Denêl
Il teritori furlan sotan de Dominante al è stât crevât intune rêt complicade di jurisdizions, aministrazions feudâls, comunitâts e privileçs gleseastics, tignûts insiemi di une rêt ingredeade, un glimuç che al tindeve a formâ grops dûrs di disfâ, e soredut cuntun profîl a tacons e maglis là che la antighe presince imperiâl si intorteave parsore des gnovis competencis de aministrazion dogâl. E chest, massime in chel coridôr strent e scjafoiât che di Scluse al puartave sù fin a Pontebe. Ma il confin al coreve stuart, dissegnant schiribiçs insù e injù, come se un frut estrôs al ves butât jù intun sfuei di pergamene une linie mate e curiose.
◆
La politiche teritoriâl
E je stade une furbade di Vignesie par scjafoiâ la anime di un popul che di miârs di agns nol veve mai cognossude la separazion. E cussì al sucêt che chei dal cjanâl di Pontebe no puedin plui svantâ dirits di bosc intes malghis parsore di Pontafel. O che, pierdint un troi parsore de Aupe, si cjatassin dut un colp di chê altre bande dal confin, a pericul di jessi cjapâts par brigants o braconîrs, o piês ancjemò par spions dal nemì. La esecuzion e jere imediade. Picjâts suntun arbul o maçâts a sun di bastonadis. Ma nol baste: dal 1445 dut si compliche ancjemò di plui, dal moment che il Patriarcje di Acuilee – che nol è plui un princip teritoriâl e pûr al continue a jessi un metropolite che al dirêç la catedre de diocesi plui grande di Europe e une des plui impuartantis de Cristianitât – al pretint di mantignî il so control su trê feuts.
◆
Aquilee, la scune, la mari.
Impussibil lassâle intes mans dal Leon. La basiliche e restave la plui grande testemoneance di ce che il Patriarcjât al veve rapresentât inte storie: un puint jenfri la Europe des valadis danubianis e i trois dai Balcans e chel mâr Mediterani là che lis trê religjons dal Libri, ven a stâi ebreus, cristians e islamics si jerin cjatadis plui voltis a instreçâ un destin comun epûr plurâl. La lidrîs greghe, chê bizantine, lis sugjestions barbarichis, il misteri e la bielece: dut chest e pandeve Aquilee, olme di une dignitât che nissune vuere, nissune sconfite e podeve mai scancelâ, par simpri.
◆
San Vit dal Tiliment
Poiade propit dongje dai passaçs sul Tiliment, e jere duncje place privilegjade par jessi puint tra lis tieris dal Ovest e chês dal Est, e di dâ acet a chei che a domandavin une polse vie pe strade. Citât maraveose braçolade di muraions che no someavin pensâts par escludi, ma pluitost par tignî dongje. Tiere di marcjadants e di artiscj, di musiciscj preseâts in Europe, cun pituris che a impiavin di fûc e di bielece lis contis biblichis sui mûrs des glesiis. Une fradaie potente, chê dai “Batûts”: e meteve dongje la sapience de pietât popolâr cu la finece des laudis, e e crodeve plui inte mission di tirâ sù ospedâi par curâ i puars, che no te leç de spade.
San Denêl
Su la vie che e puartave di Aquilee intal cûr des monts, viers de Carinzie o de Carniole. Une comunitât braurose di jessi clamade “Magnifiche”, peade ai siei statûts che a metevin dongje par iscrit lis usancis dai vons inte aministrazion de citât, inte vite dai cjamps e inte regolazion dai rapuarts cui forescj, cence mai dismenteâsi di protezi lis categoriis plui esponudis ae crudeltât de Storie, ven a stâi lis veduis e i vuarfins. Ancje chi al esisteve un marcjât libar di ogni tassazion fin dal secul XIII, e une borghesie inteligjente e vivarose e veve vierzût lis sôs buteghis, atente a invistî monede no dome tai afârs ma ancje inte bielece: afrescs, cuadris, glesiis. E une lobie comunâl là che il Renc, il consei de Comunitât, al continuave a cjatâsi par regolamentâ la vite civîl e sociâl e par aministrâ la justizie. Nol baste: intai boscuts dulintor a vignivin tirâts sù purcits che, une volte purcitâts, a regalavin lis famosis cuessis di persut, di une bontât tant straordenarie che par solit il Patriarcje ju doprave tant che regâi di puartâ in delegazion a Princips e Imperadôrs. Nol fâs duncje maravee che propit a San Denêl si decidès di meti la sede dal Vicjariât patriarchin, là che il rapresentant dal Patriarcje, om di Glesie e di Aministrazion, al direzeve lis animis e al indreçave la politiche. Il prin al fo un ciert Vuarneri di Dartigne, che a trentecinc agns di etât si sente su che cjadree tant impuartante. Om di dutrine e di grande culture, al stiçarà une ativitât inteletuâl vivarose che e cjatarà inte sô biblioteche personâl la semence par un mont dal dut rinovât. Cun lui, la Ete di Mieç si sierave e si vierzevin lis puartis dal Umanisim.  ❚