Sfuei Mensîl Furlan Indipendent
Archivi de Patrie

I ‘Brût & Madone’ a tornin a vierzi il cjôt: ducj di “pogo” cul lôr gnûf album!

Moira Pezzetta

Al è tornâts a sbreghebalon l’unic grup metal furlan par furlan. Par citâ Pauli Cantarut di Radio Onde Furlane si trate dal “grup plui violent che al sedi stât te musiche furlane”: i Brût & Madone.
◆ Nassûts tal 2006, de fusion dai musiciscj fondadôrs di Slowmotion Apocalypse, Rumors Of Gehenna e Rabiosi, i Brût & Madone a son la uniche metal band a cjantâ par furlan.
◆ Come che si definissin lôr, a son «une bande di salvadis sparniçade tra Udin e Berlin».
◆ La lôr colaborazion e je tacade par mateç, une gnot, cuant che chescj amîs si son scambiâts i struments musicâi, e daspò a son deventâts il grup di riferiment de musiche hardcore in Friûl.
◆ Cun sberladis, mosh pit e ghitaris straviadis a son rivâts a vinci il Premi Friûl e a esibîsi sui palcs di dute la Regjon. I variis impreviscj de vite a puartin i musiciscj a dividisi e a fasin in mût che no si sinti plui tabaiâ dai Brût & Madone fin tal 2015, cuant che il cjantant Kokko al à voie di tornâ a meti dongje il grup. In curt, ancje se il ghitarist Albi al vîf a Berlin, il grup si torne a riunî e a tornin a cjantâ pal public cun Viva Onde Furlane.
◆ Dopo il lôr ultin EP jessût tal Jugn dal 2018, dal titul “Amîs Bire Casin”, chest an a son tornâts cuntun gnûf album dal titul “Welcome to the cjôt”.
◆ «Il cjôt al è par no la zone sot dal palc, dulà che si fas il “pogo”, e je une fieste discjadenade dilunc dal conciert. Chest toc al invide ducj a butâsi tal cjôt!»
◆ De  prime setemane di Mai,  cuant che i Brût & Madone a àn viert il cjôt,  a son vignûts fûr altris cinc tocs: “Scjafoiament”, “Cjoc!”, “Il Cjâf” dai furlans cun metal, punk e hardcore e infin “Voi Bastarts”, che ti cjalin di stuart, cun Ciube dal Raptor Recording Studio al bas.
◆ Il lôr public afezionât ju à podûts viodi dal vîf a Udin sabide ai 22 di Avost, cuant che il metal par furlan al è tornât in place, par Suns Friûl. «Savê che dopo la pandemie, insiemi a dutis lis magagnis che nus àn dividûts, si saressin tornâts a cjatâ di gnûf a Udin, al è il miôr gnûf inizi che o podevin imagjinâsi»
◆ Cuissà ce tantis altris stage-dive che o viodarìn. E alore, vie di “pogo” cun chest grup di salvadis. Stait daûr ai canai Youtube, Facebook e ae lôr pagjine https://www.brutemadone.com/ Benvignûts tal cjôt!  ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +