Emanuele Filippi e il so gnûf disc

Il pianist e compositôr udinês
al presente “Musica Fragile”
Zovin e cu la musiche tal sanc, tal cûr, tal cjâf, tai dêts. Un talent furlan che al è cressût a notis e sunôrs, une passion nassude di frut e che lu sta puartant lontan. Une fuarce interpretative e creative impressionante, passion e sintiment, e nuie al è vignût fûr par câs, ancje se di istint lui al à simpri sintût che cheste e je la sô strade. Ma al vûl impegn, sacrifici, energjie e tante voie di musiche, di no vivi cence.
◆ Emanuele Filippi al è pianist e compositôr udinês, al à vincjevot agns e al sta dant un biel zîr di volte ae musiche di stamp jazz, improvisade, tra contemporanie e gnovis scrituris. Il so estri creatîf lu à puartât e lu puarte simpri di plui a fâ tantis bielis robis cun grancj ricognossiments.
◆ La ultime sô grande esperience, che si vierç cumò a ducj, e je la jessude dal so ultin album “Musica fragile”, disc che al si è meretât – tal ambit dal concors nazionâl “Per chi crea” – la poie de SIAE, Societât taliane dai autôrs e editôrs, e dal MiBACT, il Ministeri talian pai bens e pes ativitâts culturâls e dal turisim. Istituzions une vore impuartantis inte promozion e tutele des arts. Une grande sodisfazion, sedi par lui che il disc lu à scrit, che pal studi di produzion Artesuono di Stefano Amerio di Cjavalì indulà che lu à regjistrât, une cjase de musiche e des regjistrazions discografichis cognossude in dut il mont e che e conte cumò trente agns di ativitât.
◆ “Musica fragile” al è un disc che al è nassût a New York, indulà che Emanuele Filippi si è trasferît par un toc di timp, tant che si perfezionave al City College, dopo vê risaltât in Friûl cuntun dopli diplome al Conservatori di Udin, in pianoforte classic e in pianoforte jazz. Album scrit a New York ma nassût a cjase, contant su la colaborazion dal so mestri e amì, il pianist e compositôr di Gradiscje di Sedean Glauco Venier, che nol à bisugne di presentazions e che si è svicinât inte fase di orchestrazion dai tocs, scrits par piano, sax, flaut, ghitare eletriche e batarie.
◆ Il disc al sarà presentât in prime esecuzion assolude ai 18 di Setembar a Udin, cun Emanuele Filippi al piano e i siei amîs musiciscj che a àn lavorât cun lui pal disc e par altris concierts, sedi in Italie che di là dal ocean: Cosimo Boni ae trombe, Nicola Caminiti al sax alt e al flaut, Marco Bolfelli ae ghitare eletriche e Roberto Giaquinto ae baterie. O vin incuintrât Emanuele e i vin domandât alc su chest album gnûf, il secont dopo “Pholiphonies” dal 2018, che al à vût cetant sucès.
__
Trop Friûl isal in “Musica fragile”?
Il disc al è nassût in Friûl e daspò al è stât svilupât tra cjase e New York. Il Friûl al è dentri dal disc, ancje parcè che al è stât realizât cu la colaborazion dal inzegnîr dal sun e produtôr Stefano Amerio di Cjavalì e di Glauco Venier, produtôr artistic di cheste esperience, che al à dât un contribût fondamentâl pe realizazion di cheste grande aventure musicâl. Cun di plui, il Friûl al è ancje dentri dai sunôrs di chest disc. Pense che se lu ves regjistrât in Americhe, la rispueste acustiche e sarès stade ben diferente, plui frede, secje, daûr dai lôr guscj. Invezit, il gjenar di suns che o vin cirût e che Amerio al à savût creâ tant che mestri otim dal audio, al è cjalt, profont, intim, passionâl, e chestis cualitâts a puedin vegni fûr dome dulà che si rive a sintî chestis frecuencis, e ancje par chest il Friûl al è ideâl.
__
Un titul une vore interessant, in ce sens musiche fragjile?
Sul prin, il disc al veve di clamâsi “Short stories”, contis curtis, cun tocs apont no luncs e pensâts, no leâts a di une storie. Une dinamiche che dut câs e esist tal album, tant che sedi il trombetist Enrico Rava che il pianist american Fred Hersh, doi “mostris” dal jazz che o ai la fortune di cognossi, intes notis dal librut dal album a dedichin un pinsîr propit aes contis curtis che i varis tocs a somein contâ, cence savê des mês intenzions. Sul ultin o ai cambiât titul, par vie di une riflession che mi compagnave di timp, a proposit de impuartance che e à la fragjilitât inte formazion da persone, e nol è ben secont di me platâle, dineâle. Al è miôr ricognossile, fale sunâ, come che o ai fat e o fâs midiant de musiche. E ti jude a vierziti.
__
Cemût isal stât par te cressi di un pont di viste musicâl in Friûl?
Mi stimi fortunât, parcè che i agns de mê formazion musicâl, tacade di picinin – a dîs agns o jeri za tal Conservatori Tomadini di Udin – a son stâts vivarôs, tant pai ambients indulà che la musiche si faseve, dentri e fûr des scuelis di musiche, tant pes cognossincis che o levi a costruî cun grande passion, cun musiciscj furlans di spessôr, massime de sene jazz. Mi plâs ricuardâ la esperience che mi à viodût tant che fondadôr e diretôr de Udin Jazz Big Band, une mê creazion che mi à permetût di tirâ dongje tancj zovins come me, insiemi a altris plui grancj e navigâts, par fâ musiche insiemi intune maniere che no si jere mai viodude ni sintude prime chi di nô. Duncje, o soi sodisfat de mê cressite fate in Friûl e o soi content di podê puartâ la mê esperience artistiche ator pe Europe e pal mont. E di ciert, ancje chi a cjase.
__
A son tancj i ricognossiments che ti rivin: prins premis in concors musicâi impuartants, concierts insiemi ai miôr dal jazz, come di resint a Udin cul to tercet insiemi a Fabrizio Bosso. E cumò, Siae e Mibact ti onorin de vitorie dal bant “Per chi crea”.
Se tu lavoris ben, se tu sês costant, viert e no tu ti impontis su convinzions falsis, se tu âs costruît capacitâts tôs e tu âs robis di dî, o crôt che i ricognossiments a rivin. A fasin plasê, come cuant che la int ti bat in maniere spontanie lis mans dopo un toc, un assolo, un discors musicâl: al vûl dî che la musiche ju à cjapâts. A son sodisfazions, soredut cuant che tu sâs che a concori par un bant come “Per chi crea” a son in tantons, ma a ‘nt cjapin dome un. Se chel un tu sês tu, magari tu stentis a crodii, ma ti da plasê. Ti ven sù ancje un grant sens di responsabilitât, che par me al va ben. Al jude a fâ simpri miôr.” ❚