Il troi par une gnove didatiche
Intun paîs civilizât, la scuele, palestre fondamentâl pal cjâf dai nestris fruts, e varès di rapresentâ une prioritât intes decisions strategjichis dal guvier. Di chês sieltis, di fat, a divegnin la cualitât de educazion e de formazion professionâl dai citadins di un doman.
◆ Cemût che o vin viodût, vie pe emergjence sanitarie la gjestion de cuistion scolastiche e je stade plene di esitancis, tant di vê miôr di restâ inclaudâts intun imobilisim pantanôs impen di proponi une cualsisei soluzion alternative, magari daûr dal esempli di chei altris paîs.
◆ Un sacrifici necessari intune vision prudente e responsabile, ma forsit nol è un câs che la decision di tignî dut sierât e sedi stade puartade indenant di un dai Stâts europeans mancul pronts a meti mans al tacuin cuant che si fevele di spese publiche pe educazion.
◆ Dal rest, chestis limitazions a saltin fûr une vore ben ancje cjalant la istruzion inte nestre regjon, indulà che si varès di prudelâ l’insegnament plurilengâl e cuntune vision multiculturâl (elements di cjase fin ai inizis dal Nûfcent, cuant che, inte zone di confin, ancje une persone no scuelade e fevelave almancul dôs o trê lenghis) e invezit si va indevant a meti tacons intai mil problemis gjestionâi, fasint deventâ un vencul dut ce che nol jentre intune planificazion ordenarie (e no si fevele dome de lenghe furlane).
◆ Daspò di un cidinôr cuasi vergognôs e di ducj chei “no si pues”, cumò che a mancjin mancul di doi mês al inviâsi dal an scolastic, al è dut un cori e un vuacâ di esperts a cirî soluzions.
Di bogns furlans, però, cetancj dirigjents, professôrs e gjenitôrs a àn mostrade la lôr contrarietât e plui di cualchidun al à pensât di no pierdi timp (dibant stâ cu lis mans in man) e di provâ a pensâ a un progjet di mandâ al Ministeri, un “model Friûl” par che la scuele e deventi pardabon di competence regjonâl.
◆ O ‘nt vin fevelât cu la professore Silvana Schiavi Fachin, par tancj agns docente di didatiche des lenghis modernis te Universitât dal Friûl, deputade dal 1987 al 1992 e autore di cetancj progjets e materiâi pe educazion plurilengâl.
◆ “A fevelin dome di bancs e di cemût metiju, ma nissun al à frontât il probleme dai contignûts. Bisugne ripensâ ae scuele: la logjistiche e je impuartante, ma il prin probleme a restin la preparazion e la formazion dai insegnants, che no son suficients”, nus dîs, ricuardantnus che chest “model Friûl” nol à di deventâ la marche di un model di banc, o di cjadree (magari i podaressin pensâi chei di Manzan), fermantsi ae emergjence sanitarie, ma al à di jessi une ocasion par tornâ a meti lis fondis al sisteme scolastic regjonâl.
◆ “Une scuele regjonâl no pues dismenteâ l’aspiet dal insegnament bilengâl e plurilengâl, che al compuarte un lavôr di scuadre di ducj i insegnants, parcè che il lengaç al à di jessi concuardât insiemi. No bisugne limitâsi a passâ contignûts, si à di incressi la capacitât di resonâ e di fevelâ dai fruts. Magari cussì no, l’aspiet de comunicazion nol ven mai cjapât in considerazion”.
◆ La professore e met in vuaite ancje su la pussibilitât di cjapâ in man lis graduatoriis par risolvi il probleme de mancjance di personâl.
◆ “Si pense che cumò a coventin uns 60.000 insegnants. E la lôr preparazion? Nissun i pense. A pensin dome a cemût che al sarà il concors, se meti lis crosutis o lis domandis, ma nissun si svee di dâur une man ai candidâts par che a puedin preparâsi. Ancje la didatiche a distance e je stade un biel probleme, parcè che lis robis no si inventin sul moment. A jerin docents no preparâts e nissun si è preocupât di dâur i struments par frontâ la situazion.
◆ O ai lavorât in mieze Europe, indulà che a son agns che a formin i insegnants par vê une cualitât alte de scuele, ca di nô invezit a vegnin ignorâts. A Udin e je stade metude sù la Facoltât di Siencis primariis, ma al è dut opzionâl, figurìnsi! I iscrits a son pôcs, rispiet a chei che dopo si notin intes graduatoriis: cumò a pensin di disvuedâlis, come se chê int e ves la professionalitât! Intes prioritâts bisugne meti ancje chest: no si pues mandâ a insegnâ lis personis cence vêlis preparadis in maniere serie. Bisugne fâ come che a fasin intes industriis e pretindi che il personâl al sedi cualificât”. ❚
