Cuant che la nazion e clame!

Adispiet di dutis lis lagnancis, il guvier austriac nol à mostrât fin cumò di volê paiâ l’intervent straordenari che i “Zivis” (cussì a son clamâts i zovins che a fasin servizi civîl) a àn davuelt par cause de emergjence COVID, dopo di jessi stâts clamâts dongje cul sproc di “la nazion e à bisugne di voaltris”… e par 900 euros al mês.
Il servizi civîl in Austrie al dure al plui nûf mês, e par 1.500 zovins sù par jù al varès vût di finî chest an ae fin di Març.
◆ E je stade une sorprese cuant che, a metât di Març, il ministri competent al à fat part, pe prime volte inte storie de Seconde Republiche, de istituzion di un servizi civîl “straordenari” par fâi di saponte al sisteme sanitari intant de sierade pal virus. Une vore pôcs a savevin in Austrie di cheste pussibilitât.
◆ Cussì, 1500 zovins a son stâts obleâts a sprolungjâ il lôr servizi civîl di trê mês e, no cate che la difusion dal virus e sedi stade declarade cetant basse, a son stâts obleâts a lavorâ pe societât fin ae fin di Jugn.
◆ Tant e tant, il cûr dai zovins al à rispuindût in mût une vore positîf ae clamade dramatiche proferide dal ministri par une mobilitazion nazionâl cuintri dal virus, che par altri no varessin nancje podût clamâsi fûr. Ma, come che dispès al sucêt, cuant che si ven brincâts dal idealisim sociâl, la ricompense sclagne di cuatri carantans si piert intes pleis des cragnariis.
◆ A chescj frutats ur vegnin ricognossûts – e in dì di vuê in tancj câs dome su la cjarte – 900 euros al mês, che a son une vore pôcs a pet di un impegn cence limit; cence mancul che cheste situazion ur à savoltade la vite di ogni dì, ma ancje i lôr progjets pal avignî. Cun di plui, si à di marcâ che se a vessin riclamât – in chest câs su base volontarie – i “Zivis” che a vevin finît il servizi, a varessin vût di dâur un compens di 1.700 euros al mês.
◆ In tancj si domandin ancje se, devant di une espansion cussì piçule dal virus, al ves coventât pardabon un intervent straordenari. E a chest si zonte che plui di cualchidun al critiche il coordenament di chestis fuarcis, dispès in confusion e cence un incaric precîs di cumplî. Impen di chest, si sa di frutats che si son arolâts volontaris e che a son stâts paiâts cun regolaritât cence fâ nuie, dome par restâ a disposizion. I politics si justifichin disint che a àn volût vê pronte une risierve di podê doprâ in câs che la situazion e les al piês. Di chê altre bande, tancj che a son stâts ingaiâts fin ae fin di Jugn – simpri par 1.700 euros al mês – a son stâts mandâts vie bot e sclop, e lassâts cussì a bocje sute.
◆ In fin dai fats, se o podìn fâ un confront, nô o podìn consolâsi… ancje se i nestris convicins a continuin a cjalânus dal alt in bas. No si son fats mancjâ nuie in fat di disorganizazion e di straçariis economichis e umanis. Salacor a varessin podût mandâ cualchi zovin che ur vanzave a fa alc ca di nô pe lôr sigurece intant des vacancis cu vegnin.
◆ Par fortune, ancje in Austrie al è cualchidun che al sugjerìs che, su la fonde di cheste esperience, si puedin riviodi lis funzions dal servizi civîl cuntun voli plui atent aes esigjencis dal dì di vuê. ❚