La fuarce de Afriche che no si viôt: lis feminis

La femine e ten sù trê cjantons de cjase. La detule furlane no vâl dome in Patrie, ma ancje in Afriche. «Lis feminis a lavorin la tiere: la lôr – intai Paîs li che i peçâi si trasmetin ancje aes fiis – o chê dal om; a viodin de cjase, dai fîs, a fasin di mangjâ, a van a cjoli la aghe tai poçs e dispès a van a marcjât a vendi ce che a produsin. Si ocupin di secjâ la cjar e di fumâ il pes», e conte Silvia San Marco. Ciert, lis robis no son dapardut compagnis. «A son zonis guviernadis dal matriarcjât, tant che in Guinee, li che, intune comunitât di religjon animiste, mi à dât acet une femine, invezit dal dean de vile. A son puescj li che aes feminis ur vegnin ricognossûts savietât e podê decisionâl. In altris Paîs, invezit, la femine no vâl nuie. O pensi, par esempli, ae Mauritanie. Dispès l’aspiet religjôs al condizione lis dinamichis sociâls. Dal sigûr, ancje tai puescj li che lis feminis a puedin fevelâ in public, te assemblee de vile, di regule no si sintin libaris e alore ur cjacarìn in bande, e tu capissis cemût che a stan pardabon lis robis, cuâi che a son i problemis, ce che a fasaressin lôr par superâju».
◆ Fevelant di agriculture familiâr tal mont, lis feminis a fasin sù par jù il 50% dal lavôr, ma al è lôr dome il 15% cent de tiere (dâts Fao). Ta cheste fete a son chês di une vile puarissime de Cueste di Avoli, cence aghe di bevi ni eletricitât, li che Silvia e je lade in mission cualchi an indaûr par spiegâur la impuartance di certificâ la proprietât de tiere, di mût di evitâ i conflits peâts aes fuartis migrazions internis. «Mi soi smaraveade di tropis domandis che mi àn fat. Ta chê realtât, lis feminis a ereditin i terens li che a coltivin soròs, rîs, manioca, bananis e altris pomis che no vin chi di nô. Te vile, dome une fantate e jere lade a scuele, dutis chês altris no jerin buinis ni di lei ni di scrivi, e pûr si informavin sul progjet, a cirivin di capî ben lis robis, parcè che a cirivin tutele par lôr e pe lôr famee. Chê des feminis in Afriche e je une fuarce che no si viôt».❚ (E.A.)