Sfuei Mensîl Furlan Indipendent
Archivi de Patrie

LA STORIE – Di prostitude a muinie dopo il sassini di Beltram

Diego Navarria

Jugn 1350: par dispreseâ il cadavar dal Beât i conzurâts i meterin dongje une scorte di feminis di strade

“Mi clami Agnule, fie di Jacum dai Colùs e di Marie Asìne. O soi muinie a Udin a S. Nicolau di Puscuel. Indevant cui agns, cul cuarp clopadiç ma cul sintiment a puest, savint che no je nissune robe plui sigure de muart come nissune plui incierte de sô ore, o vuei scrivi alc de mê vite. No par fevelâ di mê, puare pecjadore, ma par lassâ testemoneance dal venerabil patriarcje Bertrant di S. Geniès.
O soi furlane, nassude a Spilimberc. A dîs agns o soi lade a stâ a Vignesie, là che gno pari al faseve paviments a teraç tai palaçs dai siôrs. Il so lavôr al rindeve ben e jo o vevi ancje un precetôr che mi à inscuelade. Magari cussì no, dopo doi agns il pai al murì e la mame si inmalà. Prime di murî, mê mari mi fidà a di une femine che, finîts i bêçs de dote, mi invià tal lavôr plui antîc dal mont, la prostituzion. Sì, o soi stade propit une prostitude. O jeri biele, studiade, mi plasevin i bêçs, i vistîts, mangjâ ben. No une sdrondine di strade ma une prostitude par siôrs. Gondule cuvierte e biele vite.
◆ Ma, si dîs, ogni biel bal al stufe. Il gno jessi furlane si faseve sintî e mi vignive simpri plui in fastidi il ciacolar venexian, i salamelecs bausârs e sgnaulâts. Cussì, o ai fat Sant Martin e o soi tornade in Friûl, tune biele cjase a Udin su la rive dal cjistiel. Il lavôr no mi mancjave: marcjadants e uficiâi dal esercit dal patriarcje. Si cjatavin ben cun me. Par ducj o jeri “Agnule, la prostitude di Vignesie”.
◆ Ma vonde fevelâ di mê. Jo o jeri, tai prâts de Richinvelde, cuant che a àn copât il Patriarcje Beltram, a 90 agns! Il prin a dâi dentri cu la lance al fo Zuan di Vilalte, che lu sdrumâ jù. Il patriarcje al rivà a dî: “Tes tôs mans, Signôr, o consegni la mê anime…” e subite Indrì di Spilimberc, Erman di Cjargne e Fidrì de Portis di Cividât i impirarin lis spadis tal pet. Il colp di gracie lu de Zuan Francesc di Cjistiel. Chest, ai 6 di Jugn dal 1350. Cheste e je la mê testemoneance par rispuindi ae domande dal riverît Patriarcje Marquart e cul permès de Mari Badesse.
◆ O ai ancje di sclarî ce che o fasevi ae Richinvelde in chê dì. O jeri alì a “servizi” dal cjapitani di Indrì di Spilimberc, il cjâf de conzure. Mi paiave ben, e jo i stevi. Cuant che mi à dit che o vevi di lâ alì, o savevi za de conzure. Po stâi che cui che al leiarà no lu sepi, ma i oms che a cirin une femine a paiament, dopo vê studât il morbin, par solit a fevelin une vore parcè che dispès no àn nissun che ju scolti. Cun me, che o savevi fâ il gno mistîr, a fevelavin: po no po, che a fevelavin! Cussì, uficiâi e marcjadants che a vevin lis mans in paste mi vevin contade, cui un toc, cui chel altri, dute la traine cuintri dal patriarcje Beltram. E o jeri vignude a savê che a cjâf de cospirazion a jerin i siôrs di Spilimberc adun cun chei cjastelans che lu coparan, dutis fameis che il patriarcje ur veve fat sbassâ lis alis. Dopo, che i mandants a jerin Cividât, invidiose pe simpatie di Beltram par Udin, e i conts di Gurize, simpri ledrôs a pene che il patriarcje ur al permeteve. Chel che tancj no san, però, al è che ae fonde di dute la traine e jere une cuistion di bêçs. Magari cussì no, a movi lis azions dai oms al è l’interès. Par difindi la Patrie e par paiâ l’esercit a coventavin tancj bêçs e il vieli patriarcje, tai ultins timps, no ‘nt veve. Il pape, invezit di judâlu, al pretindeve la sô part e la compagnie dai banchîrs di Udin, ducj florentins, e veve stimât che nol convignive plui invistî tal patriarcje, aromai ae fin, e che al jere miôr prestâ invezit une biele beçolade ai conzurâts. Sorestant dai banchîrs al jere il florentin Castrone de Bardi (il miôr dai miei clients) che, dopo vê fat une vore di afârs cun Beltram, cumò lu tradive, ancje cu la poie de Serenissime, simpri pronte a smorseâ lis cuestis de Patrie dal Friûl.
◆ O jeri ae Richinvelde, ma o vevi ancje sperance che il patriarcje si salvàs parcè che lui, tal dopomisdì de ultime Pasche, al veve impiade une lûs dentri di mê. In chê dì, ducj a fasevin fieste e jo, invezit, o jere stade cul cjapitani dal cjistiel di Udin. Avilide pe chê vite, o soi passade devant de glesie di Sante Marie. O soi jentrade e mi soi metude in zenoglon devant dal Crist. Mi è passade devant dute la vite e o ai tacât a vaî. “Parcè vaistu?” o sint dâur di me. Mi ziri e o viôt il vieli Beltram. Mi à vignût di butâmi tai siei pîts, i ai vierte la mê vite e la mê disperazion. Mai mi soi sintude tant capide. Mi dîs: “Il Signôr al à dit ai ipocrits che i publicans e lis prostitudis ur passaran devant tal ream dai cîi. Ma tu âs di molâ la tô vite! Tal claustri di S. Nicolau ti cjolaran cui braçs vierts. Salviti!”
No lu scoltai subit, ma alc mi roseave dentri. Cuant che lu ai viodût muart, sanganât e tibiât, o ai olsât domandâi a Indrì di Spilimberc di puartâ jo il so cuarp a Udin. Nol capive parcè, ma la idee che il patriarcje nemì al rivàs in citât compagnât di une prostitude i plasè. Cussì, cu la mê sierve Luzie e cun gno cusin Pieri Colùs cjariadôr di Indrì, lu vin metût su la briscje e si sin inviâts pal vât dal Tiliment. Al è stât il viaç che mi à cambiade la vite. O ai scoltadis lis peraulis santis dal patriarcje.
◆ Rivâts tal indoman a Udin, grant corot pe muart di Beltram e ancje disdegn pe infamie di meti dôs sdrondinis di scorte dal cadavar preseât. “Vergogne! Cu la putane di Vignesie!” e vosave la int. O ai vût un bon ce fâ a sclarîmi cul Consei dal Renc. Te dì dopo mi soi presentade al munistîr di Sant Nicolau, là che mi àn dât bon acet e dopo trê agns o soi deventade muinie. Di in chê volte, no soi mai lade fûr parcè che o savevi masse di chê conzure e tancj a volevin copâmi. Ma soredut parcè che mi soi avodade ae preiere. O ai la sperance che il Signôr al perdoni la mê vite di pecjâts cul jutori dal sant patriarcje Bertrant di S. Geniès. Che i furlans si visin di lui e che Diu lu vedi in glorie!” ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +