Il food finder al è un cerçadôr di profession, un che al va a cirî lis deliziis, che al dopre i siei studis e la sô esperience par cjatâ fûr prodots di cualitât altissime, che par solit no si cjatin sul marcjât o da râr. Ancje Veronica e je une food finder: e cîr (e po a ‘nt scrîf su testadis talianis di setôr) prodots enogastronomics di nicje, ristorants e ricetis.
◆ Lis sôs ultimis scuviertis? A For Disore, li che di resint e je stade impegnade te realizazion di programs promozionâi dal teritori e des sôs ricjecis enogastronomichis ancje pe Regjon Friul-Vignesie Julie, le àn concuistade une sgnape fate cu lis semencis di cumin, i çariei, e lis biris de birarie artesanâl “Fueis di jerbe”; a Sudri il pastorut – un formadi jerborinât, gras e a paste mole, fat de latarie Alto But di Sudri cul lat di mont- e a Tamau la varhackara, un pestât di ardiel, speck e panzete fumade cu la zonte di cualchi jerbe aromatiche. «A son ducj prodots identificatîfs di un teritori straordenari, che al tocje la ecelence tai formadis di malghe e te robe purcine fumade», e dîs Veronica.
◆ La cusine cjargnele, e chê furlane in gjenerâl, «e je une cusine cun lidrîs profondis, ben identificade e identificative, che si conte di bessole cui siei savôrs decîs, inconfondibii par cui che ju cognòs, che a vegnin des grandis materiis primis». ❚
