Sfuei Mensîl Furlan Indipendent
Archivi de Patrie

Veronica Defilippis, ambassadore de cusine furlane tal mont | Il profil di Veronica Defilippis

Erika Adami
Veronica Defilippis
Veronica Defilippis

Tradizion al pas cui timps. Il frico al concuiste il Maroc

Di New York a Dubai, di Bangkok a Casablanca. Veronica Defilippis e à puartât i plats tipics furlans in dut il mont deventant une ambassadore dal Friûl enogastronomic, massime de Cjargne. Cjargnele, di fat, e je la mame, che «mi à fat cognossi i plats de tradizion – dai cjarsons al frico, dai plats di salvadi a chei cu lis jerbis spontaniis – e che cumò o fâs a gno fi Tommaso». Il papà, invezit, al è puliês: «O sint ancjemò il profum de fuiace de none che mi sveave, cuant che o jeri frute, sul cricâ dal dì… des malghis al mâr, savôrs e profums che no pues dismenteâ», e dîs Veronica.
◆ La passion pe cusine, duncje, le compagne di simpri. Dopo de lauree a Triest in gjornalisim e comunicazion, e fâs diviers lavôrs, che, però, no le sodisfin. «O sintivi che mi mancjave alc, che no vevi cjatade la mê strade, il gno puest tal mont, cussì une buinore di 5 agns indaûr o ai cjapât coragjo e o ai decidût di cirî chê strade». Cun determinazion, passion e cuntune grande curiositât. «O ai simpri vût gole di scuvierzi il mont e di fâlu midiant dal mangjâ, midiant dai prodots che la tiere, gjenerose, ogni dì nus regale, midiant des mans dai artesans dal gust, dai profums e dai savôrs plui autentics».
◆ E l’amôr pal mangjâ e pe sô tiere le à sburtade a inviâ, tal 2014, la prime scuele di cusine cjargnele, “Cuciniamo con…”. «Al è stât un at di amôr viers di une tradizion gastronomiche uniche, cui siei prodots sempliçs, puars par definizion, ma cuntune lungje tradizion daûr. O vevi chê di valorizâ une filiere agroalimentâr fate di prodots gjenuins, sans e di cualitât cetant alte, e i lôr produtôrs». E alore e je nassude la propueste di une schirie di lezions – indipendentis une di chê altre – cun coghis e cogos, espression de miôr cusine de Cjargne, inovative, ma cuntun fuart leam cu la tradizion, che a doprin materiis primis ecelentis dal teritori, che ur metìn dongje vins furlans.
◆ Cu la stesse finalitât – chê di dâ vôs ai piçui produtôrs e aes lôr “creazions” -, Veronica e à inmaneât la manifestazion “Carnia, eccellenze in malga”. Cogos stelâts Michelin a cusinin, sul moment e tal viert, intun ambient naturâl sugjestîf, cui prodots des malghis cjargnelis, che des monts po a rivin su lis taulis dai ristorants stelâts, cuistant une visibilitât che se no no rivaressin a vê. Tant che la scuete fumade di malghe, che e je stade servide in Gjapon! La manifestazion – Covid-19 permetint – e tornarà ae fin di Avost.
◆ Cussì Veronica, planc a planc, e à tacât a fâ cognossi la Cjargne in dute Italie e tal forest, cjapant part a fieris talianis e internazionâls, deventant ambassadore de sô plui grande passion. Cu la sô scuadre, e à rapresentât la Italie in ocasion de setemane mondiâl de cusine taliane in Indie, tai Emirâts Araps Unîts, in Thailandie, tai Stâts Unîts, in Maroc e in Spagne. E tal mês di Jugn stât e jere a New York, al “Fancy Food”.
◆ L’obietîf di chestis iniziativis al è ancje chel di podê inviâ scambis comerciâi cun chescj Paîs par espuartâ tal forest lis ecelencis furlanis – a tacâ dal frico – e cul Maroc un acuardi comerciâl al è stât za firmât. Cussì, dopo tratativis lungjis, il plat plui rapresentatîf de cusine furlane al è sbarcjât tal continent african, proponût tai ristorants talians di Marrakech e Casablanca, “adotât” di Choumicha Chafai, star de television marochine. La idee e je chê di rivâ a proponilu ancje di altris bandis. «O ai presentât il frico a istituzions, buyers, impuartadôrs di dut il mont… Al plâs a ducj – e conte la food finder cjargnele -. Al è un prodot che al à grandis potenzialitâts, al pues vê un marcjât. Ciert, al à di jessi fat un grant lavôr di promozion e al sarès util un jutori de bande des istituzions par superâ i tancj ostacui burocratics».
◆ Par Veronica e je rivade ancje la television che «mi à permetût di contâ la mê tiere a un public plui grant. Su “Gambero Rosso” o compagni il gno coleghe Fabrizio Nonis, o cusinìn insiemi ricetis semplicis, che a puedin fâ ducj, ogni dì».
◆ Lis ideis no i mancjin, ni la voie di fâ. «O larai indenant a lavorâ par fâ cognossi e preseâ dut il valôr, la cualitât e la sapience che a son daûr di un formadi o di un salam artesanâi che no àn nuie a ce fâ cun chei che si cjatin te grande distribuzion. La int e à di jessi educade, e à di imparâ a cognossi lis nestris grandis ecelencis e, tal moment dai acuiscj, a sielzi materiis primis di cualitât, produsudis achì. Nus es invidiin in tancj».
◆ Sul troi segnât de manifestazion tes malghis de Cjargne, l’impegn plui grant di Veronica al va cumò tal rivâ a puartâ i prodots dai nestris artesans dal gust tai ristorants di nivel alt. «O cognòs ben il valôr dal bon mangjâ e des materiis primis autentichis e fiis des tradizions, che a fasin grande la nestre cusine. Ma o sai ben ancje trops problemis che a àn i piçui produtôrs a fâsi cognossi. E chi o rivi jo, che – cun articui, proponint cors di cusine e iniziativis a teme – o lavori par fâ di puint tra i produtôrs che a àn pes mans vêrs tesaurs e i professioniscj e ristoradôrs che a san preseâju e che duncje a puedin doprâju tes lôr propuestis. Bisugne insisti ta cheste direzion. Dome cussì o rivarìn a fâ “fevelâ” in taule dut un teritori che si conte pôc, ma che al à tant ce dî». ❚

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +