“Artiscj F-VJ”, clamin la nestre int a fâ i spetacui a pene pussibi

La crisi economiche che e puarte cun se cheste pandemie oribile, in plui de salût de int e dal setôr sanitari, e tocje ancje il compart dal spetacul. Plui che tocjâlu, lu scjafoie. Al è dut fer e il guvier talian, in particolâr il ministeri de culture, inmò nol è bon di esprimisi cun alc di concret. Dut sierât: museus, teatris, cines. Blocade ogni sorte di rapresentazion: musiche, prose, teatri, danze, balet, leturis e ogni gjenar di art performative. Artiscj ducj a cjase, organizadôrs e diretôrs di struturis ancje lôr, machiniscj e tecnics compagn, uficis stampe e segretariis istès. Une grande filiere dute in zenoglon e cui dincj su pe gratule.
◆ Pôcs a àn la pussibilitât di vê cualchi sostegn economic, di gracie dal Enpals, o ben dal Ent nazionâl di previdence e di assistence pai lavoradôrs dal spetacul. Pocje robe, dut câs, e la plui part di chescj lavoradôrs no àn nissun altri jutori, ancje par colpe de mancjance di un ordin sindacâl e pe pocje rapresentance a nivel istituzionâl. Une tragjedie sore la tragjedie, e alore si à di pensâ a alternativis, parcè che si dîs che al sarà l’ultin dai setôr a ricjapâ lis ativitâts, stant che la art e la culture a son agregadôrs sociâi, a clamin tantis personis che si cjatin a stâ dongje, sentadis o in pîts, une cun chê altre.
◆ Ma la art e la culture a son ancje bens di prime necessitât, bens primaris, e no si pues lassâ cori, trascurâ, dismenteâ. E, come dut, ancje il patrimoni artistic e culturâl furlan, passât e presint, al riscje il tombolon. Lis bielis e tantis iniziativis che si pandin su la rêt e sui social a son dutis laudabilis, a judin a tignîsi dongje, a condividi la creativitât, il lavôr dal inzen e de fantasie, ma no rivin a sostituî il sens dal spetacul dal vîf, e daspò no judin i artiscj a puartâ a cjase il pan. Dut a gratis, une opare di beneficence impuartante ma che no baste. E je bisugne di concretece, di tacâ a pensâ – come che e si fâs tai supermarcjâts – di proponi spetacui par pocje int, di durade curte, cun pôcs artiscj sul palc, soliscj, piçui grups, e ducj cu la mascarine e altris sistemis di protezion, in maniere di garantî la tutele sanitarie e dut ce che al covente. Di gno, o lanci la iniziative “Artiscj F-VJ”, invidant i organizadôrs di spetacui, di mostris, rassegnis e festivals, a clamâ artiscj dal Friûl e a mostrâ solidarietât ae nestre regjon inte plui part des programazions, o inmò miôr in dutis. Chest, par dâur ai artiscj la pussibilitât di tirâsi fûr di cheste crisi, e di esprimisi su la fonde des lôr tantis cualitâts. Dinsi une man, ducj insiemi.  ❚