Di cumò i articui de Patrie sul web

Partint di chest mês, i letôrs dal web a podaran lei i articui dal nestri gjornâl su internet. Une sielte par incressi la presince dal furlan su chest gnûf strument mediatic. Par spiegâ cheste sielte che e va daûr ae inovazion tal mont dai gjornâi, o vin domandât un intervent a Sergio Maistrello, espert di “citadinance digjitâl”, pordenonês e autôr di libris tant che «La parte abitata della rete» (Tecniche Nuove, 2007) e «Come si fa un blog» (Tecniche Nuove, 2004)
Simpri plui gjornâi e rivistis a sielzin di meti a disposizion i lôr contignûts e i lôr archivis storics su Internet. Il segnâl di chest cambiament di sensibilitât al è rivât tal autun passât di un dai cuotidians plui impuartants dal mont, chel New York Times che ancje dai abonaments online al cjapave alc come 10 milions di dolars ad an. Dentri de primevere di chest an, si jerin convinçûts parfin i doi plui grancj gjornâi talians, il Corriere della Sera e La Repubblica, che il lôr pluridecenâl patrimoni di notiziis si pues consultâ vuê liberementri tai rispetîfs sîts web. Ce sburtial chescj grups editoriâi potents a fâ di mancul ancje des pocjis sodisfazions monetariis che vuê e pues garantîur la Rêt? Dôs rispuestis, une cetant concrete e une altre ideâl.
LA PRIME_ La publicitât e je daûr a spostâsi de television e de stampe viers Internet, almancul tai marcjâts plui madûrs tant che chel statunitens. Nol è ancjemò avonde par meti in discussion i ecuilibris insaldâts, ma al è ce che al baste par tacâ a fâ cualchi scomesse sul avignî. Tantis plui pagjinis si vierzin ae libare consultazion, tantis plui visitis si puedin vendi ai inserzioniscj. Al è ben vêr che centenârs di miârs di pagjinis metudis a colp a disposizion di ducj, a racueiaran dome pocjis grampis di visitis ognidune. Dut câs, a nivel agregât, chest bacin di interès al è in stât di sorpassâ in tiermins assolûts ancje i letôrs des gnovis dal dì: duncje visitis, duncje potenziâi fruidôrs di publicitât. Fats doi calcui, tignî sierât chest patrimoni di materiâl za pront pal ûs intun scansel che a ‘ndi vegnin dadis fûr pocjis clâfs, nol è plui convenient.
LA RISPUESTE IDEÂL_ e à a ce fâ cu la nature di Internet, che prime di jessi un ambient di contignûts al è un ambient di relazions. Relazions tra personis, relazions tra grops de Rêt, relazions tra chei stes contignûts. La testade tant che contignidôr autosuficient e piert sens a man a man, in pro dal sisteme di fonts calcolât tal so complès. Par cjapâ sù valôr si à di rilançâ valôr; par otignî atenzion al covente prime dâ atenzion cun gjenerositât. Nol vûl dî che no si puedi vuadagnâi parsore, anzit, no cate che la publicitât e sedi il plui anacronistic dai struments. Ma la remunerazion e torne a jessi une conseguence dal operâ tal interès dal sisteme. Abolî lis centis che a impedissin aes relazions di formâsi cun libertât, al è il prin mût par metisi in linie cu lis specificitâts dal gnûf mieç di comunicazion.