Premi Friûl al vie e Carnicats al Liet

Onde Furlane e à mandât fûr il bant di concors dal Premi Friûl 2008 e duncje e je partide la machine organizadore, cul intindiment che le caraterize za di agns in ca: discuvierzi e lançâ i gnûfs talents de cjançon in marilenghe.
Par partecipâ al baste presentâ, dentri dai 30 di Otubar dal 2008, la regjistrazion di un toc inedit (su supuart digjitâl) cul test scrit in lenghe furlane o intune altre lenghe minoritarie dal teritori furlan. La formule des selezions e reste simpri compagne: di fat, tra i tocs presentâts, la jurie e selezionarà di 3 a 6 grups o sengui autôrs che a cjaparan part ae fase finâl cuntun conciert curt, de durade di 15/20 minûts.
Tra i partecipants di cheste fase, la jurie e sielzarà un vincidôr che al varà dirit ae produzion di une opare discografiche pe golaine Musiche Furlane Fuarte, in plui de concrete sperance di jessi il prossim fortunât partecipant al prestigjôs Liet International.
CARNICATS IN LAPONIE_ I Carnicats, formazion cjapitanade di Dek Ill Ceesa e vincidore de edizion 2006 dal concors promovût di Radio Onde Furlane, a son stâts di fat ametûts in mût uficiâl ae fase finâl dal Liet International, il plui impuartant festival european par cjançons in lenghe minoritarie, che si tignarà a Lulea, te Laponie svedese, ai 18 di Otubar cu ven.
La cjançon “Oz dream”, e je stade sielzude tra i passe 40 tocs proponûts di grups di dute Europe, rivant a un dai cinc puescj ancjemò a disposizion. Chês altris cinc finalistis a saran decidudis tes semifinâls che tal mês di Jugn si davuelzaran in Galizie, Frisie, Scozie e Laponie.
E cussì, tant che i lôr predecessôrs Prorastar, Kosovni Odpadki e Arbegarbe, i Carnicats a rapresentaran il Friûl te manifestazion organizade ogni an intune citât diferente di une des minorancis linguistichis europeanis.
Lis relazions tra il Friûl e Liet International a deventin simpri plui fissis: di fat, il grup vincidôr de kermesse al sarà invidât ae rassegne “Musiche – pe gnove musiche furlane”, che chest an si davuelzarà ai 28 e 29 di Novembar cu ven, al teatri Palamostre.