Siart, o Sigjeart (Sigehardus) de gjernazie dai Andechs, al fo patriarcje di Aquilee dal 1068 al 1077. La sô figure in Friûl e je di rimarc, soredut parcè che al ven ricognossût tant che fondadôr dal “stât” patriarcjâl, ven a stâi la Patrie dal Friûl. Di fat, ogni an si fâs fieste ai 3 di Avrîl in ocasion dal inovâl de sô invistidure di bande dal imperadôr Indrì IV. E i storics furlans a marchin chest so rûl. Cui che, invezit, al à scrit di lui doprant i document vaticans, lu considere un traditôr venâl, un che al à voltadis lis spalis al pape par metisi de bande dal imperadôr, fasintsi corompi in cambi di possediments e dirits.
◆ O crôt che non sedi aplicabil un judizi atuâl a avigniments di scuasit mil agns indaûr. E je vere che la invistidure dal Friûl no faseve altri che decretâ in mût formâl il dirit public feudâl su teritoris che planc a planc i patriarcjis a vevin ingrumât. Al baste ricuardâ lis concessions di Carli il Grant al patriarcje Paulin, dai trê imperadôrs Otons e, massime, dal imperadôr Corât II al patriarcje Popon, che i de ancje il dirit di bati monede.
◆ La invistidure dai 3 di Avrîl alore e fo la certificazion formâl di une situazion di fat. L’imperadôr Indrì nol pierdeve nuie, anzit, si garantive di vê tal patriarcje un aleât fedêl. Siart, cu la sô grande abilitât diplomatiche e politiche, cence rivâ a gjoldi nuie par se, al sigurave ae nestre tiere, biadelore, chel “toc di cjarte” che al coventarà, vie pai secui, par fâle deventâ chê realtât uniche in Europe che si clame Patrie dal Friûl. ❚
