Al rive il bant “Istruzion” de Fondazione Friuli, e chest an i fonts a saran indreçâts ancje ai istitûts scolastics comprensîfs de regjon. Il bant, che al metarà a disposizion dal mont scolastic 600 mil euros par progjets leâts ae istruzion, al è stât presentât ai 13 di Fevrâr tal palaç Antonini-Maseri a Udin, presints il president de Fondazione Friuli Giuseppe Morandini, Patrizia Pavatti dal Ufici scolastic regjonâl, la assessore regjonâl al lavôr e formazion Alessia Rosolen, e il diretôr regjonâl di Intesa San Paolo Renzo Simonato. «A son dôs li novitâts di chest an – al à spiegât Morandini -: la prime e je che o vin decidût di slargjâ il bant ancje ai istitûts e no dome aes scuelis. La seconde e tocje la decision di inserî – dongje de pussibilitât di inviâ progjets e laboratoris par imparâ lenghis forestis e svilupâ lis cognossincis digjitâls – la pussibilitât di presentâ propuestis leadis al sport». Ben 150 mil euros dai 600 a disposizion dal bant a saran destinâts a progjets leâts al sport. Si trate di une richieste rivade propit dal mont de scuele: «La ativitât sportive – e à dit Pavatti – e svilupe competencis trasversâl tant che la competivitât, il savê lavorâ in scuadre, capacitâts civichis e sociâls. Nus permet ancje di svilupâ altris temis tant che il mantigniment di un bon fisic e la cure de alimentazion. Nô o pensìn ancje a progjets multidissiplinârs che a viodin i insegnants di talian o di siencis in palestre cul coleghe che al insegne ativitât fisiche». L’impegn pe formazion al è puartât indenant ancje di Intesa San Paolo: «O vin metût a garanzie – al à dit Simonato – 250 milions par meti a disposizion dai students universitaris jutoris leâts al merit. A chest si zonte ancje il lavôr di formazion cul progjet “Giovani e lavoro” che al interessarà 5 mil students tai prossims trê agns. Al moment, a son stâts formâts za 700 di lôr».
«Il bant de fondazion – e à dit la assessore Rosolen – al è in linie cul lavôr che e fâs la Regjon, che dome pe istruzion e à metût chest an 26 milions di euros. Un dai grues lavôrs che o fasarìn tai prossims agns al sarà meti dongje dut ce che al inten il dirit al studi, par creâ un percors unic, plui facil di frontâ pai operadôrs dal setôr». ❚
