Tancj insegnants in pension: si fâs fature a cirî docents di furlan

In spiete de certificazion linguistiche dai docents (nol varès di mancjâ trop, dal moment che il sisteme di valutazion al è stât prontât), par podê sigurâ lis oris di insegnament di furlan lis scuelis a scuegnin fâ afidament ae famose liste regjonâl che, dut câs, no sigure une competence reâl. Al pararès che dute chê sdrume di int e sedi plui che bastante, ma la veretât e je che i istitûts no rivin a stâi daûr e a son ae ricercje continue di figuris professionâls espertis, ancje difûr de liste. Come che nus conte Antonella Ottogalli, referente par Docuscuele, chest an al è probabil che buine part dai finanziaments e torni indaûr, stant che l’an passât in regjon a son lâts in pension passe 800 insegnants e tantis scuelis si son cjatadis cence referent interni pe lenghe furlane. I uficis regjonâi, par altri, no furnissin i contats dai docents increditâts, duncje cirî i mestris al devente ancjemò plui faturôs.
La opzionalitât dal insegnament, al è clâr, e compuarte dute une schirie di problemis a nivel organizatîf, in plui di creâ ancje prejudizis che a rindin la lenghe une materie di serie b, se no fintremai di serie c, no dome pai gjenitôrs, ma ancje par coleghis e dirigjents. Par fortune, la situazion no je plui cussì grotescje come cualchi an indaûr, ma bisugne lavorâi ancjemò parsore – e tant – par che il furlan al cjati il ricognossiment just. Par prionte, aben che a sedin tancj i gjenitôrs che a domandin l’insegnament intes scuelis secondaris di prin grât, inte plui part dai câs lis lezions no fasin, se no par progjets minims, ma nissun al proteste o al domande di meti in vore ce che al è previodût de leç. Intai ultins timps, dut câs, si à vude une incressite dal interessament dai mestris, che a seguissin i cors e lis iniziativis di Docuscuele. Ancje la produzion e je vivarose: un grum di lavôrs al rive dai concors, ma a son ancje mestris che a àn gust di condividi i lôr progjets.
Par dîle juste, aben che chescj materiâi a sedin une vore interessants par chel che al inten i contignûts, se o lin a viodi la grafie a son ben pôcs chei che si salvin. A chest pont, bisugne domandâsi cuale che e sedi la finalitât dal insegnament in lenghe furlane: doprâ la lenghe tant che mieç di aprendiment e fâ fevelâ i fantats par furlan (o ancje dome fâural scoltâ) o imparâ a scrivile?
«Ducj i doi» nus rispuint convinte Daria Miani, insegnante che e veve frecuentât il cors di perfezionament di passe 300 oris de Universitât dal Friûl intal 2015 (e condutore dal program televisîf par frutins “Maman”). «Magari cussì no, la situazion che si viôt ator e je pietose. A mancjin lis fondis, ma tantis mestris no si preocupin di no vê lis cognossincis suficientis. Mi capite tantis voltis di viodi tescj plens di falopis e scrits cui pîts che a finissin tai cuaders. Il probleme al è che chestis coleghis no àn nancje la cussience dal tuart che a fasin. No si preocupin dal erôr di grafie, ur baste che al passi il concet. Ma cheste superficialitât e je cetant pericolose, parcè che i fruts a cjapin sù un insegnament sbaliât. Pensait ae lenghe inglese: nissun docent si insumiarès mai di scrivi peraulis sbaliadis».
In dì di vuê, dal rest, a esistin tancj imprescj par evitâ cierts erôrs. Cui che nol vûl imparâ a cognossiju e a doprâju, forsit nol varès nancje di jessi dentri te liste. ❚