ATUALITÂT – INCHIESTE Publicitât par furlan: a ce pont sino? – 4 (fin)

Sul finî di chest nestri zîr in cuatri pontadis (tai numars di Mai, di Jugn e di Lui si cjatin chês altris trê) o sin lâts ator pes sagris e pes stradis furlanis e o vin ancje scoltât la radio… ve ca ce che al è vignût fûr.
Nol è un paîs, grant o piçul dal Friûl che nol vedi une pro loco o un comitât organizatîf impegnâts tal meti sù une sagre o une fieste. Jenfri lis plui cognossudis la Sagre dal Vin a Bertiûl, la Sagre dal Cunin a Cjastions di Strade, la Fieste dal Vuardi a Tombe, la Sagre dai Cais a Turide, la Sagre dai Emui a Flambruç, Çurçuvint: ierbas e tradision, la Fieste dai Cros a Bueris, Balìn insieme sul breâr a Paulâr, Fasìn la mede a Sudri, Fieste sot il Crupusignâr a Darbe, la Sagre das Cartufulas a Soclêf, la Sagre dal Frico a Cjarpât, la Fiesta tas corts a Ravasclêt, la Fieste de raze a Muimans, la Sagre dai Pirus a Pavie e tantis altris. Chest an o vin cjatât che sul daûr de cartuline che e promoveve la Fiesta das Moléas e dàs Cirigniculas di Vasinis, al jere ancje alc scrit par furlan, te variant locâl. Alc al è alc e nuie al è nuie si dîs, ma il plui des voltis dome i nons des sagris a son furlans juste parcè che a restin di tradizions vieris, ma dut ca! I programs a son, no si scjampe, par talian e alore si lei: serata danzante con…, funzioneranno fornitissimi chioschi…, pesca di beneficenza…. E coventarès magari une operazion a nivel di Associazione Regionale fra le Pro Loco del Friuli Venezia Giulia, par che a cjalassin cuntun altri voli la lenghe dal puest, metintle simpri di plui dongje dal talian, dal inglês e dal todesc.
Bandonìn il discors sagre par tornâ sui nons des ativitâts comerciâls e des aziendis in gjenerâl. Za o vin dit, e cualchidun al à fat ancje ricercjis (viodi la prime pontade de inchieste), che a son tancj chei che i dan un non furlan aes lôr impresis, e alore no scuvierzìn nuie di gnûf; ma nus plâs segnalâ che suntune uniche vie a Sarsêt di Martignà, in vie Cividine, su la stesse bande de strade si cjatin in pôcs metris, trê realtâts: il bar Chi di nô, une aziende produtore di tendis che si clame Pratic (e no volìn pensâ che nol sedi furlan) e un altri bar cul non plui classic Lì de Pueste… masse bondance che cuasi nol pâr vêr! Forsit investî ancje su chest nol è cussì sbaliât cemût che ur pâr a chei che a àn la puce sot dal nâs e a pensin che a sedin operazions provinciâls, o peadis ae nostalgjie.
Però la notizie che scuasit nus à fat colâ de cjadree e je chê che l’IAL – Friuli Venezia Giulia, agjenzie formative che e da une ufierte une vore largje e svariade in materie di formazion, e à sielt di promovisi doprant ancje la lenghe furlane. Renata Del Regno, responsabile de comunicazion dal IAL, nus à fevelât de campagne ideade par fâ publicitât ai cors di formazion professionâl e che e je nassude de esigjence di butâ fûr un messaç su la oportunitât di sielzi un percors scolastic che al ven considerât, in maniere no juste, tant che une soluzion di repeç. «O vevin bisugne di un messaç fuart che al fevelàs a la int concrete dal nestri teritori, che si svicinàs a chês fameis che pai lôr fîs a vuelin prin di dut un lavôr «sigûr» e tun timp plui curt che si pues. La sielte dal furlan nus è sameade chê plui logjiche. Dal sigûr la decision e à fat vignî fûr un dibatiment (ancje dentri dal nestri grup): l’ûs de lenghe furlane che ancje se te vite di ogni dì al è pandût, te publicitât al fâs nassi cualchi cencenament (cuissà parcè che il doprâ l’inglês invezit no). (…) La campagne e je stade pensade doprant diviers mieçs vie pal mês di Lui: par pueste aes fameis, cun cuatri jessudis sul Messaggero Veneto, cun volantins zontâts a gjornâi locâi, cun 1.200 manifescj metûts fûr in 26 Comuns de Provincie di Udin e cun 210 spot radiofonics di 30 seconts (siet ogni dì) trasmetûts su Radio Company, Radio 80, Easy Network, Marilù, Studio Nord.
Cheste e je une part dal test dal spot:
(…) Hai finito la scuola media e vorresti entrare nel mondo del lavoro? Accetta un consiglio – Une scuele par un bon lavôr! (…)
Ancje se Del Regno e à marcât che «dome il sproc al è par furlan», nô o sin convints che un segnâl al è distès: si lei la voie di jessi plui sclets e di rivâ drets ae int, tun moment li che si cîr sigurecis. Il podê comunicatîf al è dut strucât in sîs peraulis e jenfri chestis, trê a vegnin fûr di plui: scuele, bon, lavôr…. Tal nestri stîl: no coventin migo masse nainis!
Cun cheste o sierìn e nus pâr ancje di viodi in chel che o vin contât, soredut in mert a cheste ultime iniziative, un troi just e un pocje di lûs… Lis propuestis lis vin za fatis, adun cun cualchi provocazion: cuissà se a cualchi imprenditôr i è vignude la gole di provâ!
Elena Zanussi