Chest an a son cent agns che al è nassût pre Checo Placerean (30.11.1920). Par pre Antoni, ma par ducj nô di Glesie Furlane, pre Checo al è stât une lûs, une mestri di vite, di glesie, di passion pal nestri popul e par un vanzeli incjarnât. Pre Antoni al à scrit tancj articui su di lui, ancje un libri: “Pre Checo Placerean, notis par une biografie”, che al merte let. In cheste anade o proponìn a pontadis un so intervent, dal 2001, par no dismenteâ chest profete furlan.
pre Roman Michelot
O soi culì a tentâ di sclarî il misteri dal om e predi, dal mestri e dal testemoni pre Checo intal so rapuart speciâl e vitâl cu la autonomie. O vin tante pocje int che e à lassade semence preziose, in chest nestri Friûl puar e sfortunât, soredut a nivel di culture e di spirt, che no podìn fâ i merecans. O scugnìn onorâ, celebrâ, scoltâ, imparâ e imitâ chei pôcs profetis che Diu al à mandât in chest so vignâl bandonât e cence cise, là che ognidun al passe a tibiâ, rafant ce che i pâr e i plâs, cence un segnâl di rispiet e di agrât. Ancje in cheste nestre tiere sventurade, ancje in chest secul tormentât che o vin a pene sierât, Diu al à volût regalânus cualchi anime buine che e iluminàs la nestre gnot, che e segnàs il nestri troi, che e impiàs la nestre sperance, che e sclipìs il nestri cûr.
Pre Checo, dutune cun pre Bepo Marchet, cun Felix Marchi, cun Tarcisio Petrac e cun cualchi altri, a son biei regâi, che a van gjoldûts. Parcè che no dome a àn savût jessi vîfs e vivarôs inte lôr vite, ma pal fat che, a diference dai comuns mortâi, a rivin a vivi e a fâ vivi ancje dopo muarts. In fuarce des lôr ideis che a van plui in là de rude contingjence e a partecipin in cualchi maniere a chês ideis maris, a chês categoriis, a chei postulâts che a son la fonde stesse de nestre esistence. Di sigûr, la peraule “autonomie”, insiemi cun libertât, cussience, dignitât, identitât a partegnin a cheste famee benefiche e benedete.
Pensant a pre Checo, par chel che o ai podût cognossilu intal timp vonde curt de nestre frecuentazion sporadiche, dividûts come che o jerin no dome di resons cronologjichis e gjeografichis ma ancje di spessôr e preparazion inteletuâl e di diversitâts profondis di caratar – lui sigûr e fuart, e jo plen di dubis e di pôris -, mi vegnin tal cjâf lis peraulis che si leilis vierzint il libri dai Ats dai Apuestui: “Tal gno prin libri, Teofil, o ai tratât di dut ce che Jesù al à fat e insegnât” (At 1,1). Ancje a scuele nus fevelavin dai dits e dai fats di Jesù. Un mestri come che Diu comande, un mestri che al merti un titul cussì impegnatîf, al à di dî e di fâ, al à di insegnâ cun ce che al dîs e di fevelâ cun ce al fâs, dal moment che ancje il fâ al è un insegnament. Anzit il prin, insostituibil.
Se e mancje la testemoneance de vite, dut il nestri insegnament al piert di valôr e di savôr e lis nestris peraulis, ancje lis plui bielis e rifinidis, a son “un bronç che al sune e un tamburel che al sglinghine”, par doprâ lis peraulis di Pauli (1 Cor 13, 1). ❚
