Sfuei Mensîl Furlan Indipendent
Archivi de Patrie

ATUALITÂT – Ancje il balon al fevele par furlan

............

Si visaiso chel grant strisson da la Associazion Udinese Club che ogni tant al ven tirât su al stadi in distints centrâi, chel des grandis ocasions, chel cu la acuile zale de Patrie e lis scritis «FUARCE UDINÊS, FUARCE FRIÛL»? Po ben, al è dome un dai tancj strissons che ogni domenie a fevelin par furlan des gradinadis, une vôs tes vôs, che e rive plui lontan des berladis dai tifôs, stant che chês scritis daspò lis viodìn ancje par television e sui gjornâi.
Il furlan tal balon al è vîf, berlât, cjantât, mostrât; e ancje cualchi club di tifôs blancs e neris al à volût tacâ a clamâsi cul non par furlan.
O vin provât a cirînt cualchidun par cognossi miôr lis resons di cheste sielte.
E propit «Blanc & Neri» al è il non dal Udin club di Cjarpât: o vin sintût Thierry Pividori, che al fâs part dal diretîf dal club, e nus à dite che il non al è stât sielt a la unanimitât parcè che ur someave origjinâl, ma ancje parcè che «Al à une cierte afinitât… cul vin!», nus conte ridint.
A Cjasteons di Strade invezit a àn pensât al plui classic dai imnis par clamâ il lôr club, o ben «Alè Udin», in pîts aromai di 15 agns, come che nus conte il president Claudio Cesarini: «O vin sielt chest non parcè che e je la peraule plui doprade dal tifôs furlan, sclete ma fondamentâl».
Ancje a Sant Vît de Tor al è un club dal Udin, cuntun non che al dîs dut: «Amôr furlan». A la domande «Cemût vêso decidût par un non furlan» la presidente Susanna Toffolo nus à dite: «Prin di dut o sin furlans. Po dopo, cuant che si sin metûts dongje par decidi cemût clamâ il club, o vin pensât a une robe che nus unìs, e chel al jere propit l’amôr pe scuadre e duncje un amôr furlan! La sielte e je stade fate a la unanimitât 3 agns indaûr, di fat il club al è inmò zovin, ma o sperìn di cressi simpri di plui».
A Perteade il club dal Udin al à cjapât non invezit dal ristorant dulà che al à sede, di fat si clame «Chei de la Capannina»; ancje lôr, nus conte il president Cristian Minin, a àn proviodût a fâ il strisson e la bandiere cul non dal club. Ma des intervistis fatis e vegnin fûr ancje lis dificoltâts che ducj i clubs a àn incuintrât daspò lis gnovis leçs pe sigurece intai stadis: a coventin autorizazions e i strissons a àn di jessi a norme. Ce che invezit no mancje cuasi mai e je la bandiere de Patrie, chê cu la acuile zale su font blu come tal mantel dal Patriarcje Beât Bertrant, che i nestris intervistâts a disin di puartâ cun braùre par ogni partide, ancje intes trasfiertis: un segnâl che al cres simpri plui, un svant che al ven mostrât no dome tes partidis in cjase ma ancje ta chei altris stadis, soredut chei forescj.
Ma l’Udin al vante ancje tancj clubs lontans de Patrie: di fat in tancj fogolârs furlans a son nassûts grops di migrants che a continuin a tifâ pai blancs e neris e a seguî lis partidis ancje grazie a lis gnovis tecnologjiis (internet, web tv) come il club di Bruxelles, chel di Zurigo, chel di Budapest ma la liste e sarès lungje. O ricuardìn un dai ultins nassûts, chel di Mar del Plata, in Argjentine, che al è stât fondât intal mês di Març di chest an e za iscrit a la AUC. Si conferme cussì ce che za nus veve dit Gianluca Bertozzi, responsabil dal ufici stampe de Associazion dai Clubs dal Udin, te interviste publicade su la Patrie di Avost 2009, che al marcave il sens di partignince che la tifoserie dal Udin e à ator pal mont cjatant te scuadre di balon un element di identitât adun cu la lenghe furlane.
Tornant in Italie ancje chi o vin sparniçâts un pôc par dut clubs di tifôs, come a Rome, Turin, Potence: e propite in cheste ultime citât o vin cjatât un club dal non significatîf, «Di là da l’aghe», che, come che nus conte il president Francesco Novellino, aromai di seconde gjenerazion di migrants, al sta simbolichementri a indicâ la lôr posizion gjeografiche! Il club dal Udin al è stât fondât grazie a la passion di so pari pe scuadre furlane: cumò Novellino e i tesserâts dal club a seguissin lis partidis dai Blancs e Neris in variis localitâts dal sud Italie e si son ativâts ancje cun maiutis cu la scrite par furlan e un grant strisson dal titul «Potenza friulana».
Nuie ce dî, une passion che no à confins, ni teritoriâi ni linguistics!
Ma fevelant di tifoserie blancje e nere, no podevin fâ di mancul di ricuardâ ancje la intense «ativitât» di Raffaele Serafini, (pai blogarins cognossût ancje cul non di Cîl Glaçât: http://cilglaciat.blogspot.com, n.d.r.) che, ancje se nol fâs part di un club, ogni domenie al mande so pari al stadi cuntun gnûf strisson, scrit oviamentri par furlan, cun dissens e batudis une vore sarcastichis che puntualmentri, ben par noaltris, a finissin sul gjornâl.
Venusia Dominici
____________________________________
CONTATS CLUBS DAL UDIN
Amor Furlan
San Vito al Torre
Pres. Toffolo Susanna
c/o Bar la di Lorr,
via Roma, 62
San Vito al Torre 33050 – UD
Alè Udin
Castion di Strada
Pres. Cesarini Claudio
c/o A la Vecje Ostarie,
via Cavour, 1
Castion di Strada 33050 – UD
Blanc & Neri
Carpacco
Pres. Di Stefano Marcella
c/o Bar alla Speranza, piazza Libertà, 10
Carpacco 33030 – UD
Chej de la Capannina Pertegada
Pres. Minin Cristian
c/o Ristorante la Capannina, via Costantini, 1
Pertegada di Latisana 33050 – UD
Di là da l’aghe
Potenza
Pres. Novellino Francesco
largo Isabelli, 2
Potenza 85100 – PZ

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +