________________

… ma a restin tifôs de Rome

✽✽ Al bastarès cjalâ la foto che e mostre la Serracchiani vistude di tifose romaniste, ospite de trasmission televisive “Quelli che il calcio” par capî che al cûr centralist no si comande e che dispès, daûr des declarazions di façade, e je dome tante ipocrisie. Nus e visìn ducj, Debora presidente, biel che e faseve fente di jessi une tifose dal Udin tes tribunis dal Friuli, i siei sipariuts ridicui cun Renzi intant che, dentri di jê, no i freave propite nuie. E pensâ che e je lade in Parlament, a malistent, in graciis di cheste regjon: i volarès par dî pôc un minim di rispiet tai confronts dai sportîfs, ancje siei eletôrs.

Parcè fâ riferiment a chest episodi cussì banâl, ma significatîf? Pe semplice reson che cheste maniere di fâ nus ricuarde une vore chê dal Pd nostran cuant che al à di frontâ il teme de autonomie furlane.

✽✽ Doi esponents di rilêf di chel partît, Enzo Martines e Roberto Pascolat, il prin cjâf grup in Comun a Udin e chel altri segretari provinciâl, a àn rilançât che nol è tant la ipotesi di une atenzion plui fuarte ae cuistion furlane, ancje se mantignint la solite jeve al centri de unitât regjonâl. Forsit a son daûr a inacuarzisi che al è alc che al criche, intal ecuilibri delicât di podês cun Triest, o che il futûr nol è par nuie biel par buine part di cheste tiere.

✽✽ Dut cuinçât, al è clâr, cu la denunzie inevitabile de mancjance di pês politic des fuarcis autonomistis. Juste par dî: parcè al plurâl e parcè no ricognossi che in dì di vuê e esist une uniche formazion rapresentade in Consei regjonâl, il “Pat”, che si declare autonomist e che e je stade pardabon la uniche novitât intal panorame dai partîts? I daial forsit fastidi al Pd di constatâ la sô presince a nivel istituzionâl e sul teritori? Sigûr di sì, par chel che tal so Dna al à simpri vude la supierbie e la paronance dal podê. Cuissà parcè, a tornin iniment i cinc agns dal guvier Serracchiani!

✽✽ Di ce bocje che a rivin lis critichis, cuant che invezit e coventarès une riunion di autocussience coletive di dirigjents, ma ancje di iscrits e di simpatizants, par vê lassât che chest sisteme e metodi antidemocratic al les indenant inte realizazion des Uti, lis Unions teritoriâls intercomunâls, intal maçalizi ambientâl volût di Terna, inte ruvine de sanitât e di altris setôrs. Un partît punît dal vôt e che nol somee che al vedi ancjemò imparade la lezion.

✽✽ Al vignarès di domandâi propit a Martines parcè che juste a Udin e intal so Consei comunâl lis propuestis che a tocjin il cantin de identitât furlane no viodin mai il so grup, sostignidôr infogât di chestis iniziativis, a ben che critic par cualchi aspiet: o pensi al Teatri Stabil Furlan o ae aprovazion des liniis di politiche linguistiche dal Comun.

✽✽ Une robe a son lis declarazions di intindiments, une altre e je metilis pardabon in vore.

La storie dal PD e je plene di intindiments intal frontâ la cuistion furlane. A son pôcs, tant che Lizzero, Baracetti, Schiavi Fachin, che a àn vude la fuarce e la coerence par lâ indenant, tancj altris, cuasi ducj, si son fermâts aes declarazions di principi, subite inneadis intai distinguo e intes zirucadis.

✽✽ Scotât de mancjade presince di esponents locâi intal marcjât di ministris e sotsegretaris – fat che al dimostre la mancjance di pês dal Pd dal Friûl-Vignesie Julie e no dai autonomiscj – ancje il segretari regjonâl Cristiano Shaurli, al à provât a alçâ la vôs. Al somee dut câs che nissun lu scolti cuant che al imbastìs la idee di un partît federât cun Rome. Di bande dai siei compagns triestins, e no dome, al è rivât un elegant: «O ‘nt fevelìn plui indenant». Cussì indenant che no si viôt la vignude. ❚

Dree Valcic