INCHIESTE. «Al è necessari un pat sociâl tra i furlans»

«Se si invistìs daurman, i prins risultâts tra 10-15 agns.
Inte spiete no reste che la imigrazion»

«Une riprese subitanie de natalitât e de feconditât al è un fenomen che inte storie no si è mai realizât di nissune bande, se no dopo grandis catastrofis e vueris. I risultâts des politichis demografichis che o metìn in at vuê, ju viodarìn tra 10-15 agns, ben di là de durade di une legjislature o di une aleance politiche. Al covente un pat sociâl solit, un acuardi su cualchi aspiet che ducj a calcolin necessari pal futûr, che al vadi di là des situazions politichis». Cussì Alessio Fornasin, docent di Demografie al Dipartiment di Siencis economichis e sociâls de Universitât dal Friûl.Il Friûl nol è metût mâl intal contest nazionâl: «Il Sud al patirà intai prossims agns un declin demografic fuart – al zonte Fornasin -. Ca di nô e je invezit plui atrazion di personis di difûr che in part e moreste la situazion». Duncje, intal periodi curt nus podarà salvâ dome che la imigrazion? «Al è inevitabil, se o volìn mantignî il nivel di ativitât economiche e no cjapâ la strade dal declin – al sclarìs Fornasin -. Se o fasarìn politichis di creazion di lavôr no cualificât, a cuvierzi i vueits a saran i forescj. Se invezit o invistìn sul lavôr une vore cualificât, ancje tancj zovins talians che vuê a van tal forest a podaressin decidi di fermâsi inte nestre regjon. Dut al dipent des sieltis che o fasarìn».
«Il declin demografic al va indenant de metât dai agns Sessante fin a vuê – al dîs Fornasin -. Vuê al va piês dai agns dopo de Grande Vuere: li, finît il conflit, tornâts a cjase i soldâts, la natalitât si è ricjapade in maniere naturâl e in curt. Vuê invezit o sin devant di un dât struturâl, no je in at une crisi che nus fasi vualmâ un pussibil svelt recupar de feconditât, o ben intal numar medi di fîs par femine. Il declin di cumò al dipent in grande part dal sbassâsi dal numar di feminis in etât fertile, parcè che aromai la gjenerazion dal baby boom e je daûr a passâ i 48 agns di etât, ma ancje pe riduzion dal numar medi di fîs par femine».
Cualis lis causis? «A son ben cognossudis, di tancj agns – al evidenzie il professôr -. I studis sul declin de natalitât a àn une storie pluridecenâl. Il grant declin al à vude la sô ponte estreme te metât dai agns ’90, cuant che la Italie e jere deventade un câs di studi pai nivei di feconditât plui basse mai regjistrâts inte storie: plui o mancul 1,19 fîs par femine, in cualchi regjon fintremai mancul di un. Lis resons a son stadis individuadis in cuistions di gjenar economic (il cost dai fîs al è cressût une vore intai ultins decenis), la precarizazion dai zovins che e sburte a intardâ la etât de maternitât e de paternitât, i gnûfs stîi di vite edonistics…».
Ce i scjampie ae politiche par podê frontâ il probleme? «Al è interessant che inmò vuê il numar di fîs desiderât al è ancjemò di 2. A van dislontanâts i ostacui che no permetin di realizâ cheste progjetualitât familiâr. Lis cuistions demografichis no si frontin intal periodi curt, ma inte otiche dai 10-15 agns. Ce che al è sucedût al jere stât ben previodût da demografs. Cui che al guvierne al à di resonâ par timp sul futûr. Mi pâr che aromai dutis lis formazions a son convintis che il câl de natalitât al sedi un probleme. Alore si àn di cjapâ proviodiments, aromai ben cognossûts in altris Paîs, intant che ca di nô o vin viodût dome intervents spot che no àn vût continuitât, tant che par esempli i assegns pai gnûfs nassûts. Bessôi a coventin a pôc, ma a funzionin se a son dentri intun insiemi di misuris (assegns familiârs, abatiment des retis scolastichis e dai coscj familiâr, difusion dai asîi nît e des scuelis a timp plen, permeti une cierte elasticitât dai oraris par facilitâ la conciliazion cjase/lavôr…). La Gjermanie e veve nivei di feconditât plui bas de Italie. A son intervignûts in chest sens e i risultâts si viodin». ❚
R.P.