Di Rome a Udin. Criminalitât e mafie tra di nô

Avertiment di stamp mafiôs
ae nestre gnove colaboradore,
la gjornaliste Floriana Bulfon
Cun chest numar si invie la colaborazion cun La Patrie dal Friûl di une nestre brave coleghe: Floriana Bulfon, gjornaliste furlane che e lavore a Rome par Repubblica e L’Espresso e che si ocupe di criminalitât organizade, terorisim internazionâl, pedofilie e cyber security. Floriana e curarà une rubriche, “Une furlane a Rome”, in paralêl a chê realizade dal nestri ex diretôr Dree Venier, “Un furlan a Milan”, che nus contaran trop che di furlan al è intes dôs citâts principâls dal Paîs e di trop che chel che al sucêt là al pues jessi di ispirazion pe nestre realtât furlane.
Cun chestis dôs riis, che o anunziìn la gnove rubriche, o volìn pandi dute la nestre solidarietât par Floriana, stant che te sô machine lunis ai 8 di Avrîl, a Rome, e je stade cjatade une butilie che e veve dentri licuit inflamabil. Un avertiment clâr di stamp mafiôs. Si strenzìn ducj ator di jê: Floriana, professioniste brave e determinade no si fermarà, e nus fâs braurôs vêle cun nô.
O cjapìn la ocasion par manifestâ solidarietât ancje al coleghe Giovanni Taormina dal Tgr Rai Fvg che pôcs dîs dopo, te sede di Udin, al à vût ancje lui un avertiment criminâl midiant di une buste cun dentri doi proietii di pistole. Chest a rimarcâ che criminalitât e avertiments mafiôs no son dome fats lontans, ma a son presints ancje sul nestri teritori e la nestre atenzion e à di restâ alte. ❚
par cure de redazion