Sfuei Mensîl Furlan Indipendent
Archivi de Patrie

INTERVISTE. Pietro Fontanini. Udin simpri plui furlan

............

Fat bon il plan speciâl
di politiche linguistiche

La centralitât di Udin, pe regjon furlane, e je peade a resons di caratar storic,
gjeografic e culturâl. Citât emporiâl e di servizis, cûr de formazion scolastiche e universitarie regjonâl, Udin – tant che al à dit il sindic Pietro Fontanini tes sôs declarazions programatichis – e je clamade a cjapâ sù un rûl clâr di vuide pal Friûl ancje par chel che al inten la valorizazion de sô identitât, une identitât che si compon di cetancj elements impuartants. Tra chescj, la lenghe e à un caratar fondamentâl. Cussì, cun chê di tutelâ e promovi il svilup dal furlan, il Comun di Udin si è indotât, cu la consulence de Agjenzie regjonâl pe lenghe furlane, di un so plan di politiche linguistiche pal
cuincueni 2018-2022, secont Comun in regjon a fâlu dopo chel di Tresesin. Ce vuelial dî tal concret? Lu vin domandât al sindic Fontanini, che al à tignût par se la deleghe ae promozion de lenghe furlane.
«Lis azions previodudis a intervegnin su plui cjamps: de toponomastiche aes tabelis e a dutis lis indicazions scritis indreçadis al public tai uficis dal Comun e dai ents che i derivin, che a saran par furlan e par talian, tant che i timbris e la cjarte intestade dai uficis comunâi. Dentri des istituzions si à di fevelâ furlan, te comunicazion istituzionâl. Po, te programazion des ativitâts culturâls si valorizaran simpri plui lenghe e culture furlanis. In curt o metarìn in pîts la Associazion Teatri stabil furlan, fondamentâl pe cressite de nestre culture».
__
Udin plui furlan, in sumis.
«La capitâl dal Friûl e à di dâ l’esempli par fâ cressi la nestre lenghe ancje dentri lis istituzions. Par me, che o soi inamorât de lenghe furlane e un difensôr de nestre identitât, al è un oblic fâ in mût che il Comun di Udin al vedi un plan speciâl di politiche linguistiche. Lu metarìn in vore in maniere progressive, tacant de segnaletiche».
__
In Consei comunâl, sono stâts ducj dacuardi a fâ chest pas te direzion de tutele e dal svilup de lenghe furlane?
«Il plan nol à vude la poie dal Partît democratic, cualchidun al à votât cuintri, altris si son astignûts. Mi displâs, parcè che cuant che si è tratât di difindi lis minorancis, la lôr rapresentativitât, par efiet de riduzion dal numar dai deputâts e dai senatôrs, chei dal Pd lu àn fat, disint che la presince des minorancis in Parlament e va tutelade, fale dopo resonâ in maniere contrarie intune altre istituzion. Bisugne vê coerence. Jo, te mê vite aministrative, no ai mai tradît l’impegn a dâi dignitât ae lenghe furlane, ancje – di parlamentâr – fevelant par furlan in Parlament».
__
Plui furlan in Comun, e ancje a teatri. La Zonte comunâl e à za fat bon il progjet di meti in pîts la Associazion Teatri stabil furlan. Cui aderissial?
«Oltri al Comun di Udin, la Fondazion “Teatri Gnûf Zuan di Udin”, la Agjenzie regjonâl pe lenghe furlane, la Societât filologjiche furlane, l’Istitût ladin furlan “Pre Checo Placerean”, il Css Teatri stabil di inovazion dal Friûl-Vignesie Julie e la Civiche Academie di art dramatiche “Nico Pepe” di Udin. E varà di curâ ogni iniziative indreçade ae realizazion, al svilup, ae difusion e al sostegn des produzions teatrâls in lenghe furlane».
__
Agns indaûr chei compits ju varès vûts di davuelzi la Farie teatrâl furlane, che e veve metût dongje la plui part dai sogjets che cumò a jentraran te Associazion. Chê esperience e je finide mâl, parcè varessie di funzionâ chest colp?
«La Farie teatrâl furlane no veve la fuarce economiche ni il ricognossiment de Associazion. Esistial il Teatri stabil in lenghe slovene? Sì, alore al à di esisti ancje chel in lenghe furlane che al varà di vê une dotazion finanziarie almancul compagne di chel sloven, ancje se i furlans a son plui dai slovens e a varessin di vê plui contribûts. Pe Fondazion o previodìn di partî cun 100 mil euros: 50 mil ju met il Comun e 50 mil la Arlef. Po, o larìn a bati casse in Regjon».
__
La prime produzion tal cartelon dal “Zuan di Udin”?
«Il prossim an. Sperìn che ancje l’Ent regjonâl teatrâl dal Friûl-Vignesie Julie le puarti ator».
__
Tra i siei obietîfs e jere ancje chel di meti in pîts la Cjase de furlanetât a Vile Toppani. A ce pont sino?
«La cjase e je di proprietât dal Comun, fin chê altre dì e jere de Provincie. I furlans a àn dirit a vê une lôr cjase, un lûc dulà che si puedi contâ la nestre culture. E deventarà chel che al è a Barcelone pai catalans, si trate dome di copiâ».
__
Cuant saraie pronte?
«A mancjin i bêçs. Viodìn se la Regjon nus da une man. Il prossim an o domandarai un finanziament di mût che tal 2021/’22 si puedi tacâ a lavorâ».
__
Stant che i furlans a rapresentin une des minorancis linguistichis plui numerosis in Europe, al veve cjapât l’impegn di ativâsi par puartâ a Udin la Agjenzie europeane pes lenghis regjonâls. Sono gnovis?
«Nissune gnove. Il lavôr si è fermât cuant che al è cambiât il Parlament. O speri che cualchi candidât o grup politic furlans a tirin fûr la cuistion dilunc de campagne eletorâl pes europeanis, ma e covente la poie di Rome, che no je scontade».
__
Une aziende furlane, tes setemanis stadis, e à domandât la cognossince dal furlan par assumi. Tancj a àn fevelât di discriminazion (che si ledi a lei il coment te prime pagjine, ndr), tancj altris a àn difindût la sielte. E tal public, pensial che al sedi necessari introdusi tai concors la cognossince de lenghe furlane?
«E je une bataie di percori. Probabil che il Tar si meti di traviers se o vessin di previodi la cognossince dal furlan come criteri obligatori intun concors. Mi promet, però, di fâlu. Bandirìn concors cun chest recuisît obligatori».
__
Lui al à firmât la letare li che 76 sindics de Assemblee de Comunitât linguistiche furlane a àn scrit ai cjâfs de Rai par domandâ une informazion plui atente aes minorancis linguistichis regjonâls e ecuilibrade tra ducj i teritoris de regjon e al à poiât ancje la ultime azion de Assemblee de Clif li che – se no saran cambiaments te situazion – si fevele di azions legâls. Fin a ce pont isal disponibil a lâ indevant su chest front?
«Il Comun di Udin al è in prime linie ancje ta cheste bataie. Di cuant che l’abonament Rai si paie cu la bolete de lûs, e duncje nol è plui pussibil boicotâlu, si pues dome ricori ai tribunâi par viodisi ricognossût il dirit a vê trasmissions radiotelevisivis in lenghe furlane, tant che a disin lis leçs. E po, al mancje ecuilibri te informazion, sbelançade su Triest, ma su chest la Rai e fâs fente di no capî».
__
Sul numar di Zenâr da “La Patrie dal Friûl”, il president dal Comitât pe autonomie e pal rilanç dal Friûl Paolo Fontanelli al domande che la cuistion furlane e sedi al centri des riformis istituzionâls e al denunzie che ducj i pas politics che o viodìn, a van bande un indebiliment dal Friûl a pro di Triest. Lui – che al è de stesse fuarce politiche ae maiorance in Regjon, la Leghe – condividial cheste analisi?
«Il Friûl al à di domandâ plui considerazion. E no si pues ridusisi a ripristinâ lis Provinciis come che a jerin prime. Al sarès di metisi dacuardi tra furlaniscj. Lu dîs di agns, e je di creâ, sul model dal Trentin-Sudtirôl, une regjon cun dôs realtâts aministrativis: di une bande, la Vignesie Julie, ma e pues jessi ancje la citât metropolitane di Triest, se le vuelin, e, di chê altre, il Friûl storic cu lis vecjis provinciis di Gurize, Pordenon e Udin».
__
Duncje, dentri Gurize. E Monfalcon?
«No, e je Bisiacarie. Dut câs, a decidaran chei di Monfalcon se lâ cun Triest, citât metropolitane o gnove Provincie speciâl che e sedi. Al è stât un grâf erôr che il Consei regjonâl nol vedi permetût di fâ un referendum consultîf su chest teme, une vergogne».
__
Ta cheste architeture istituzionâl e teritoriâl, Udin ce part aial?
«Udin al à simpri rapresentât il centri dal Friûl. E la sô centralitât, pe regjon furlane, e je peade ae sô posizion gjeografiche e a resons di caratar storic e culturâl, che a àn fat cressi la identitât furlane. Cualchidun – a Pordenon in particolâr – al pues no jessi dacuardi, ma bisugne capî la storie».
__
Se la storie e fisse il so rûl di capitâl dal Friûl, Udin cemût puedial zuiâlu in tiermins di svilup economic?
«Tal so ultin libri, il professôr Marzio Strassoldo al à dimostrât che doprâ la lenghe furlane al puarte svilup economic. Duncje, afermant la nestre identitât, si àn beneficis: tu deventis specific, origjinâl, parcè che tu dopris une lenghe diferente che e cualifiche un teritori e, duncje, ancje la sô produzion, ma o vin di fâ un salt di cualitât».
Al è tant ce fâ e une Universitât di Udin fedêl al so mandât istitutîf, che le voleve imprest di cressite culturâl e economiche par dut il Friûl, e che invezit al è stât «tradît», al marche Fontanini, e podarès deventâ riferiment e motôr inovatîf par un recupar de centralitât dal Friûl, che al passe ancje traviers il leam cun culture, storie e lenghe dal Friûl. Ta chest sens, Udin – in graciis dai siei aministradôrs, o almancul une part – «al pues deventâ model par dut il Friûl in merit de presince, visibilitât e ûs de lenghe furlane», une citât fuarte de sô identitât e braurose di rapresentâ dut il Friûl te promozion di chest fondamentâl element di ricjece culturâl.❚
par cure de redazion

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +