Sfuei Mensîl Furlan Indipendent
Archivi de Patrie

TERITORI – SLOVENIE. Lis cjasis dai slovens

............

Al è un an e mieç che il setôr edilizi tai paîs de Union europeane al sta vivint un moment di crisi fuarte. Tignint sot voli ducj i 27 membris de Ue, tal mês di Mai, rispiet a un prime, al è stât un câl dal 11par cent te costruzion di gnûfs edificis. Ancje la Slovenie no si gjave fûr di chest periodi grivi, anzit: dopo la Romanie, che e à fat segnâ il dât plui preocupant (-24 par cent), il secont paîs european cu la percentuâl plui negative e je propit la Slovenie (-21 par cent). Se o metìn dongje il prin cuadrimestri dal 2009 cui prins cuatri mês dal 2008, i numars a fevelin a clâr: a pet dal prin cuadrimestri dal an passât, i edificis tirâts sù in dut il paîs a son stâts il 30 par cent in mancul, in totâl pôc plui di un miâr par 450 mil metris cuadrâts di metrature, mintri che di Zenâr a Avrîl dal 2008 a jerin stâts 645 mil m2. Lis robis a son ladis inmò piês se si fevele di apartaments: mancul 41 par cent tai prins cuatri mês di chest an. Si trate dai piês risultâts dal setôr edilizi sloven di almancul trê agns in ca.
830 MIL_ Dut câs, si pues dî che i slovens, come i furlans, i tegnin une vore ae cjase. Ai 31 di Dicembar stâts, in dut il paîs a risultavin jessi 830 mil apartaments, di chescj 430 mil intes citâts: no pôcs, tignint presint che la Slovenie e à a pene doi milions e 20 mil abitants. Dome tal an passât, a son stâts tirâts sù dîs mil apartaments. In rapuart ae popolazion, i comuns li che a son stâts fats sù plui palaçs a son uns trente di lôr; jenfri chescj, localitâts turistichis tant che Piran/Pirano e Kranjska Gora.
Tal paîs nestri vicin, il «periodi di aur» de edilizie al è stât intai agns Setante dal secul passât. Di fat, no cate la indipendence e la cressite economiche dai ultins agns, in Slovenie il 22 par cent dai apartaments al è stât costruît jenfri il 1971 e il 1980. Magari cussì no, il 20 par cent dai locâi nol à il riscjaldament centralizât e il siet par cent al è cence bagn.
FONT PE CJASE_ Ancje in Slovenie e esist une sorte di «edilizie popolâr»: o stin fevelant dal Stanovanjski sklad (Font pes abitazions), ent public nassût tal 1991 subit dopo la indipendence, cul obietîf di finanziâ il program residenziâl nazionâl e par costruî o ben restaurâ edificis. Chest orghin al à di lavorâ tal interès public, invistint tes areis di residence e dant prestits (vâl a dî, mutuis) cuntun tas bas a cui che al à a ce fâ cun dificoltâts economichis. Cun di plui, a vegnin decidudis condizions di favôr pes cubiis zovinis che a vuelin comprâ un apartament.
President dal Font al è Janez Podobnik, za europarlamentâr e ministri pal Ambient.
DUCJ SU LA CUESTE!_ Une striche di tiere che e à fat e e fâs gole a no pôcs di lôr: a son dome 43 i chilometris de cueste slovene che e da sul Adriatic, e cui che al pues permetisal di sigûr nol fâs di mancul di comprâsi une seconde cjase su la rive dal mâr. Po stâi ancje che si trati di une tierce cjase, stant che, par un sloven che al à bêçs, l’apartament o la vilute su lis Alps al è un sium di rindi concret il prin pussibil. Si trate soredut dai siorons dal interni, massime Lubiane e Maribor, che su lis stradis di Cjaudistrie/Koper/Capodistria, Isule/Izola/Isola e Piran/Pirano si fasin viodi cul ultin model di Opel o di Mercedes. Al è ancje cualchi proprietari forest, soredut todescs e austriacs, massime dopo che tal Fevrâr dal 2004 il marcjât imobiliâr sloven al è stât viert a ducj i citadins de Ue.
Un metri cuadrât su la cueste al pues rivâ a costâ ancje 4 mil euros, plui che tal centri di Lubiane, li che si tocjin i 3.500 euros. In locâi di dulà che si pues gjoldi di un panorame une vore biel sul mâr, si son tocjâts parfin i 6 mil euros par metri cuadrât.
Cualchi an indaûr e je tacade ancje la corse par cuistâ e par sestâ cjasis vieris e cjasâi dirocâts sul Cjars sloven: comprâts par un blanc e un neri, cumò a valin un grum di plui.
LA CJASE PAR SLOVEN: VOCABOLARIUT
DOM = cjase, domicili
DOMA (di lei: DOMÀ) = a cjase, in cjase
DOMACˇ = di cjase; nostran; dumiesti
HIŠA = cjase, famee
VRSTNA HIŠA = cjase in schirie
MONTAŽNA HIŠA = cjase prefabricade
STANOVANJE = apartament
BLOK = condomini
ALESSIO POTOCCO

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +