Sfuei Mensîl Furlan Indipendent
Archivi de Patrie

INTERVISTE. «La cuistion furlane che e sedi tal centri des riformis istituzionâls»

............

Saraie une architeture dai ents locâi dal dut gnove, che e varà atenzion pes identitâts culturâls e teritoriâls, ma ancje pes esigjencis di disvilup e di competitivitât, o nus vignaraie servide une specie di mignestre riscjaldade che e rissusite lis vieris Provinciis? Di ciert al è che si è daûr a jentrâ intune fase decisive par tornâ a dissegnâ l’asset dai podês e de modalitât di distribuzion de spese regjonâl sul teritori dal Friûl-Vignesie Julie. Il vôt che cun chel il Consei regjonâl in Dicembar al à fissade la fin de stagjon disgraciade des Uti, al segne une acelerazion. L’assessôr regjonâl aes Autonomiis locâls, Pierpaolo Roberti, anunziant che dentri dal 2019 la zonte di centridiestre e vararà la sô riforme, al jere stât une vore prudent intal descrivi i gnûfs ents, metint dome doi palets precîs: i lôr vertiçs a varan di jessi elets dal popul, parcè che cui che al gjestìs bêçs publics al va judicât dai citadins, e la ripartizion dal teritori e varà di rispietâ lis identitâts locâls. Sui podês des gnovis Provinciis, però, la idee di Roberti no someave distacâsi in maniere significative dal passât. Dopo, inte conference stampe di fin dal an, il president Massimiliano Fedriga al à detât une acelerazion, disint che lis gnovis Provinciis a saran “speciâls”, dant duncje la idee di une riforme plui incisive e inovative, magari che e vedi il cûr di frontâ il grop antîc dal rapuart tra il Friûl e Triest. La creazion des Uti de bande de zonte di Debora Serracchiani e à cence dubi indebilît il Friûl a pet di Triest, puartant inte capitâl lis competencis plui impuartantis des vieris Provinciis e dividint il teritori furlan intun grum di mini ents un cuintri chel altri, armâts par dividisi fruçons di finanziaments dispensâts cence une vision strategjiche complessive. Ancje i prins mês dal guvier Fedriga no àn propit invertide la tindince. Cemût si puedial saltânt fûr? Nus ufrìs une leture Paolo Fontanelli, president dal Comitât pe autonomie e pal rilanç dal Friûl.

«La nestre tiere e je une realtât policentriche – al premet Fontanelli -. Lis diviersis areis omogjeniis che a componin il Friûl (Friûl Ocidentâl, Friûl Orientâl, Cjargne, Basse Furlane, Friûl di Mieç…), a àn dirit ognidune di vê une proprie forme di ricognossiment istituzionâl. Chest al cree però un disecuilibri a pet de aree metropolitane di Triest capitâl, e al è daûr a compuartâ une pierdite di identitât dal Friûl viodût in mût complessîf».

__

Duncje ise une “cuistion furlane” che la riforme di Fedriga e varà di frontâ?

«In Friûl al è un probleme demografic a dî pôc tragjic, che la politiche si vise a lamps, il plui des voltis in mût strumentâl, e che si tradûs intun impuariment dal tiessût sociâl di largjis areis. Par esempli la Cjargne, ma ancje zonis de planure furlane, in pierdite economiche parcè che il prodot interni sporc al è leât a strent aes dinamichis demografichis naturâls, che a chês si unìs il tas fuart di emigrazion dai nestris zovins, specie i laureâts e chei formâts miôr. Devant di dut chest, il Friûl nol à un “lûc” istituzionâl che al rapresenti lis dibisugnis e che al puedi esprimi strategjiis. Bisugne duncje cjatâ, dal pont di viste de architeture dai ents locâi, une forme che midiant di chê il Friûl intal so complès, pûr ricognossint lis sôs diviersis entitâts, al vedi un so centri politic. Cuant che la Serracchiani e à varât lis Uti, tant che Comitât pe autonomie e pal rilanç dal Friûl o vin afermât che il cuintrialtâr dal “svuacet dal Friûl” al veve di jessi par necessitât il puartâ a Udin la capitâl dal Friûl-Vignesie Julie. Se di no, o varìn simpri Triest capitâl predominante, e di chê altre bande un teritori framentât e duncje insignificant di un pont di viste politic. Lu viodìn ancje in chescj dîs intes sieltis su la Fondazion pe ricercje o su la aministrazion dal setôr logjistic regjonâl, che a àn puartât dut il podê decisionâl inte citât di Sant Just. Il Friûl al è destinât cussì a indebilîsi in maniere progressive dal pont di viste politic e economic».

__

Dut chest za si lu viôt in maniere nete. Di fat, il president dal Consorzi di svilup economic dal Friûl, Renzo Marinig, al à vût di anunziâ che la stazion logjistiche feroviarie de Ziu e viodarà la lûs no intal 2019, cemût che al jere previodût, ma intal 2024 (forsit… cuissà, o zontìn nô…). Il Friûl al viaze in “litorine”, invezit a Triest i invistiments feroviaris sul puart a viazin cul Frecciarossa…

«Cualsisedi persone che si sedi interessade a nivel alt (Confindustrie, Cjamare di Cumierç e vie indevant) di politiche economiche e scuen ae fin constatâlu. La aghe e cor simpri bande il mulin di Triest… Magari cussì no, ancje i politics furlans cuant che a rivin inte citât alabardade, al somee che a vegnin colpîts cence fal dal virus dal “no a Udin” cuant che si fevele di localizâ centris decisionâi par dute la regjon».

__

Une assemblee rapresentative dal Friûl, che e puedi elaborâ e rapresentâ i siei obietîfs strategjics, podaressie jessi une propueste percoribile?

«Di chest si à discutût cun fuarce inte legjislature passade, cuant che il sindic di Rivignan-Teôr, Mario Anzil, al à lançât il referendum propositîf par creâ dôs provinciis autonomis di Triest e dal Friûl, e ancje cuant che chest teme al è stât elaborât des “Lezions di autonomie” promovudis di un grup di sindics: un dibatiment, chest ultin, che al è finît intal emendament dal conseîr Claudio Violino che al à puartât ae creazion de Assemblee dai sindics de Comunitât linguistiche furlane. Al voleve jessi un prin pas, che i veve di lâ daûr un infuartiment di rûl, di struturis di supuart e di compits di rapresentance efetive e no dome simboliche dal teritori. Il zurament di ben 18 conseîrs par furlan la dì dal insediament dal Consei regjonâl e veve fat sperâ ben, ma cumò dutis chestis spietis a son daûr a lâ in nuie tant che nêf tal soreli. La esigjence e reste, ma ducj i pas politics che o viodìn a van bande un indebiliment dal Friûl a pro di Triest. E mancje une vision strategjiche furlane. Che si pensi ai colegaments stradâi tra Udin e Pordenon: no si è mai viodût che lis dôs capitâls di manifaturis di une regjon a sedin colegadis di une statâl che, tra tarondis e trafic, e domandi – se e va ben – une ore par passâ fûr 40 chilometris… Ma di Pordenon si va indevant a proponi di 40 agns no la autostrade par Udin, ma la Cimpel-Secuals-Glemone che e taie fûr la aree udinese».

__

Cui puedial rialçâ sul teritori e inte ativitât politiche chê bandiere che e jere stade dreçade dai referendums propositîfs par un asset istituzionâl di Udin e Triest tant che Trent e Bolzan?

«Cheste vision e jere clare intai grups che a àn sostignût il Pat pe Autonomie, il moviment autonomist che al à puartât a Triest doi conseîrs regjonâi. Al covente cjatât fûr il cjaveç. I furlans no son un popul che al va in place cul gjilè zâl, ma a àn bisugne di jessi sensibilizâts e mobilitâts. Vuê la opinion publiche furlane si inflame sul probleme dai migrants, che dal pont di viste socioeconomic al è ben pôc, intant che si è daûr a pierdi di viste i ponts focâi pal futûr dal Friûl ancje in merit al disvilup economic e ae ocupazion dai nestris zovins. Al covente un moviment che al conti ai furlans ce che al è daûr a sucedi pardabon e cemût che a son daûr a puartâ vie il futûr ae nestre tiere». ❚

Roberto Pensa

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +