Sfuei Mensîl Furlan Indipendent
Archivi de Patrie

Il Servizi civîl, dai agns Setante in dì di vuê

............

Leçs regjonâls a àn creât ancje specifics servizis civîi regjonâi o provinciâi.
L’esempli di Trent e Bolzan

Il Servizi civîl al nas tai agns ’70, in Italie come in tancj Paîs, tant che servizi alternatîf al militâr pai obietôrs di cussience. Vie pai agns, in gracie di une serie di proviodiments legjislatîfs, il servizi civîl al piert ciertis limitazions e aspiets punitîfs che lu cjamavin al inizi, fin che tal 2001, cuant che pal servizi militâr a sunavin lis cjampanis a muart (il prin Guvier D’Alema al veve a pene inviât il procès che al varès sostituît l’esercit di jeve cun militârs volontaris), la leç istitutive dal Servizi civîl nazionâl lu trasforme intun servizi volontari disleât dai ambits militârs, viert a zovins e zovinis e gjestît dal Stât.

Il servizi, che tal 2017 al devente Servizi civîl universâl, viert a ducj i residents di etât comprendude tra i 18 e 28 agns, citadins talians e forescj, al compuarte une indenitât di 433,80 euros mensîi par 25 o 30 oris par setemane, e al pues jessi prestât in diviers setôrs di ativitât – dal ambit socio assistenziâl ae cooperazion, de protezion civîl al ambient, de culture e spetacul al sport, de agriculture ai dirits – cuntune durade di 8 mês a un an, in Italie o tal forest.

Dongje dal Servizi civîl nazionâl/universâl, une serie di leçs regjonâls e à creât ancje specifics servizis civîi regjonâi o provinciâi, gjestîts des singulis Regjons e Provinciis, che un zovin al pues sielzi in alternative.

Cualchi ent locâl al è particolarmentri atîf e organizât: la Provincie Autonome di Trent, un precursôr cul so Servizi civîl universâl provinciâl des riformis jentradis dopo tal Servizi civîl universâl (plui di mil volontaris formâts in 4 agns), e ufrìs une grande flessibilitât te struture e te modalitât di adesion ai progjets, che a puedin lâ dai 3 mês ai 12 e a tocjin une grande varietât di setôrs, cuntune atenzion particolâr pes esigjencis di formazion professionâl dai volontaris.

La Provincie Autonome di Bolzan, dongje dal so Servizi civîl provinciâl volontari, e organize ancje un Servizi volontari estîf par students di 15-19 agns, di 6-8 setemanis par 30 oris par setemane, in ambits tant che la tutele dal ambient, la protezion civîl, la educazion al svilup e la assistence sanitarie e sociâl. ❚


Stefania Garlatti-Costa

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +