LIS PARABULIS DI PRE ANTONI. La cjandele

Ancje la cjandele, in plui che dâ lûs, e devente spieli di vite e di umanitât: plui si consume e plui e met in vore la sô funzion, deventant benefiche e utile. Un biel esempli par nô che o sin utii te misure che o savìn dâ alc di nô, dâ nô stes pal ben di ducj. In chest, ancje la cjandele par pre Antoni e devente parabule e spieli dal Ream di Diu.
pre Roman Michelot
Cui no aial presint une cjandele e la sô utilitât straordenarie? Cumò mancul, che si à dut eletric o eletronic, ma cuant che Crist al à fevelât dai cristians tant che “lûs dal mont” al pensave di sigûr ae cjandele, stant che il soreli al è lui.
La cjandele e je biele a pene comprade, ma e je frede te sô supierbie. E je biele ancje cuant che e je a mieç, che si sta consumant par regalâ lûs e calôr a chei che le cjalin. Ma o disarès che la sô bielece e rive al colm intal ultin, cuant che la sô flame clopadice e je l’ultin regâl di un che al à dât dut. E te sô umiltât (no umiliazion), al somee che e domandi perdon par no podê dâ plui nuie parcè che e à dât dut.
Nissune maravee duncje che e vedi tante significazion tal mont religjôs. E no dome par resons di scûr e di lûs fisics. Parcè che la cjandele e je significante ancje tal materiâl che e je fate. Normalmentri cu la cere des âfs. Inte Bibie lis âfs, insiemi cu lis furmiis, a son il spieli di une vite dute intente a fâ dal ben, a no straçâ il timp, a lavorâ tal grant prât dal mont.
Ma la âf e à ancje une altre virtût, a pet – par esempli – de moscje, che no cor di mancul, ancje se e cor dibant.
Biel che la moscje e va di vite là che e je robe muarte o fraide, no disdegnant nancje il ledan, la âf e va dome là che a son rosis. E se e cjate une plui profumade e biele, no spiete nancje un lamp a bandonâ il mancul pal plui. Un inset une vore positîf. E cu la sô fadie nus da la mîl, segnâl de dolcece e de sostance che al à di vê ogni cristian, anzit ogni om.
Une robute puare tant che la cjandele, che e à iluminade la puaretât dai nestris vecjos e ju à compagnâts fin sul jet di muart e ancje tai lôr biâts funerâi come sacrament de fede te resurezion, e à dutis chestis significazions, une plui biele di chê altre.
No isal just alore dî che il ream di Diu si pues metilu a pâr di une cjandele? ❚
pre Antoni Beline