I LIBRIS SIMPRI BOGNS. Un volum par ricuardâ di dulà che o vignìn

AA. VV., Communitas Civitatis Aquileiae – Aquilee inte storie, Marian dal Friûl, 2008
(par cure di Flavio Cossar)
__
«La storie milenarie di Aquilee no je scomençade tal 181 prin di Crist, cuant che i Romans a àn decidût di fondâ une gnove colonie par fâ cuintri ae minace dai Istris e dai Celtis. Tal lûc dulà che e nassarà la citât a son stadis cundizions buinis pal insediament uman za in epoche preistoriche».
Aquilee e rapresente un patrimoni di ricjece storiche, culturâl, linguistiche, antropologjiche par dut il Friûl e no dome pal Friûl. Patrimoni che salacor nol è vonde preseât, ni cognossût nancje di chei che lu àn sot dal nâs. Il Comun di Aquilee al à vût il merit di editâ chest volumon di scuasi 350 pagjinis, miezis par talian e miezis par furlan (la traduzion e je par cure de Cooperative Serling che e à sede a Remanzâs).
A son sîs contribûts, firmâts dai miôr esperts dal nestri teritori tant che Giulia Mian cun Cristiano Tiussi, Renato Iacumin, Gabriele Caiazza, Maurizio Puntin e Ludovico Nevio Puntin. Nus contin la storie di Aquilee tacant de antichitât e lant indevant fin ae Ete di Mieç, ae etât moderne e contemporanie, lis origjinis e il disvilup dal Cristianisim, la toponomastiche. Scuasi in ogni pagjine a son fotografiis (passe 200, dutis cun didascalie da pît de pagjine), mapis, riproduzions dai mosaics, viodudis de citât in epochis diferentis, ritrats e fotos segnaletichis dai prins sindicaliscj, come par compagnâ il letôr in chest viaç a scuvierzi cualchi aspiet pôc cognossût.
Cualchi fal di stampe si podeve evitâlu (pp. 207, 231, 298, tant par dî), ma la leture e je une vore plasevule e fintremai divertente, come intal episodi di chel socialist che al voleve batiâ so fi Giordano Bruno; il plevan i à dit di no e alore lu à clamât dome Giordano, ma un an daspò al secont fi i à metût non… Bruno.
E complete il libri la tabele cu la sucession dai Vescui aquileiês de origjin fin al 1751, date de sopression dal Patriarcjât.
Sicu che al dîs il sindic di in chê volte Alviano Scarel inte sô introduzion, la dibisugne che al à l’om di savê cui che al è e di indulà che al ven no si pues scjafoiâle. E alore chest libri nus ricuarde a ducj nô furlans che o sin vignûts di li. ❚
Laurin Zuan Nardin