FONDAZIONE FRIULI. Notis barochis tai lûcs dai Tiepolo

Al va indenant il cicli di concierts di musiche baroche inte suaze de “Le giornate del Tiepolo”, afidât ae direzion artistiche di Flavia Brunetto e promovût de Fondazione Friuli. Il desideri di tornâ a scoltâ la grande musiche dai agns dulà che Giambattista e Giandomenico Tiepolo a vevin piturât Udin cun oparis di une bielece straordenarie al invie, tai lûcs frescjâts dai doi grancj pitôrs,  ripropuestis di alt nivel des musichis di chê ete, metint dongje lûcs e suns in reclams continuis jenfri soluzions des arts figurativis e di chês musicâls.
Dal 2010 tai lûcs di Udin dai doi Tiepolo, ven a stâi il palaç patriarcjâl, il domo, la glesie de Beade Vergjine de Puritât e il cjistiel, si son podudis scoltâ lis musichis dai plui famôs compositôrs dal Sietcent, tant che Vivaldi, Boccherini, Scarlatti, Bach, Händel, adun di chês dai musiciscj che a Udin a viverin e a operarin tai agns che i Tiepolo a crearin lis lôr oparis in citât. Si trate di compositôrs che a Udin a forin mestris di capele tant che Paolo Benedetto Bellinzani o Bartolomeo Cordans, o tant che i udinês Giuseppe Garzaroli e Giovanni Battista Tomadini, il palmarin Pietro Alessandro Pavona, o musiciscj che ancje se nassûts a Vignesie a divignivin di fameis di origjin furlane tant che Giovanni Battista Ferradini. In ducj chescj compositôrs si cjate la gracie e la lizerece dal Tiepolo, la imagjinazion e la vitalitât, il ciment de invenzion e la stravagance.
Jordi Savall, Le Concert des Nations, Sonia Prina, Vivica Geneaux, Romina Basso, la Baroque Venice Orchestra, Giuliano Carmignola, Evangelina Mascardi a son cualchidun dai nons dai ospits preseâts dal progjet articolât e plurienâl sostignût di Regjon Friûl-Vignesie Julie, Universitât di Udin, Fondazione Friuli, parochie di Sante Marie Anunziade, Museu dal domo, Associazion Iduna, Academie Ricci e Css.
A son ancjemò doi i apontaments in program chest an: vinars ai 3 di Avost, aes 9 sot sere, inte glesie de Beade Vergjine de Puritât  si podarà preseâ la trombe baroche di Oliver Lakota (prime dal conciert, aes 8 e un cuart, e sarà une visite vuidade aes oparis dal Tiepolo) e domenie ai 2 di Setembar, aes 5 sot sere, in domo a Udin, il grant conciertist todesc Wolfgang Zerer al sunarà suntun orghin Nachini dal 1751. L’ingrès ai events al è libar. ❚
Piero Cargnelutti