«E covente une rêt moderne par puartâ la “Italie in minorance” ae atenzion continue dai media e de politiche»

Un gnûf libri, burît fûr di Ctrl Magazine, al conte la realtât di cinc minorancis: walser, tabarchine, arbëreshë, grico e ocitane. Interviste al coordenadôr dal progjet Nicola Feninno
«O stin lant al mancul» o, par dîle cul titul origjinari, «Stiamo scomparendo – Viaggio nell’Italia in minoranza». Al è, cun di fat, chest il titul di un libri burît fûr di pôc di Ctrl Magazine, une realtât de Lombardie che, ancje in gracie di cheste operazion, e à cjatât gnovis energjiis e consens pai siei reportages naratîfs e fotografics.
Ctrl Magazine no je une realtât editoriâl che si ocupe tal specific di lenghis e di culturis mancul pandudis, ma e je une ativitât editoriâl che e crôt che «a esistin
realtâts fûr dai radars che a meretin di jessi contadis». La publicazion e je stade presentade ai 8 di Lui a Stazione Topolò. Nicola Feninno al è il coordenadôr dal progjet, diretôr dal Magazine e un dai cinc autôrs che a àn contât ancjetantis minorancis.
__
Diretôr Feninno, prin di dut, cheste operazion fate di un mieç di comunicazion che o podaressin dî gjeneralist pai argoments tratâts, ce acet aie vût tal vuestri public?
«Un grum bon. Anzit, parsore di ogni spiete. A son stadis tantis lis domandis par vê une copie dal libri, ma ancje nus stant rivant cetantis segnalazions e storiis di int che e fâs part di altris minorancis e che e à voie di fâ savê che e esist e che e à alc di contâ e di condividi».
__
Voaltris o vês contade la realtât di cinc minorancis: walser, tabarchine, arbëreshë, grico, ocitane. Il titul dut câs al fâs vignî i sgrisui. Pardabon sono realtâts che a van sfantantsi?
«Il titul al à volût jessi une provocazion. O sin partîts par chest viaç dopo di une riflession in redazion sburtade dai studis dal linguist inglês David Crystal, che al à calcolât che ogni 14 dîs tal mont e mûr une lenghe e che tai ultins 500 agns o vin pierdût sù par jù la metât des lenghis che i oms a fevelavin. Cun di plui, i 70 agns de Costituzion nus àn stiçât une riflession su la aplicazion dal articul 6 de Cjarte costituzionâl, dulà che la tutele des minorancis e cjape fonde».
__
Ce vêso cjatât tal vuestri viaç?
«Tal gjavâ fûr lis cinc minorancis di contâ o vin intindût di vê posizions diferentis dal pont di viste gjeografic – di sot dal Monte Rosa fintremai in Pulie o a Sud de Sardegne – e dal pont di viste de vivarositât des lenghis e des minorancis. Duncje, o vin cjatât realtâts un grum diferentis: dai dome doi-trê mil di lôr che aromai a fevelin grico tal Salent, dissendents dai grêcs che a rivarin alì za fa secui, ai fruts e fantats che a àn puartât il tabarchin – un gjenovês antigon – fintremai su Facebook e a scuele, ancje se cheste no je une minorance ricognossude cu la leç statâl 482/99».
__
Letôrs incuriosîts, une operazion che e à fat scjas, minorancis ognidune che e fronte il presint in mût diferent… Se o vessis di tirâ une conclusion gjenerâl di chest vuestri reportage, vivût tal concret e no gjavant fûr lis informazions dai libris, cuale saressie?
«O vin sintût une grande bisugne di pontâ i rifletôrs su chestis minorancis; o vin cjatât un grant sens di partignince, sedi tes minorancis che o vin contadis, sedi in chês che si son fatis indevant par presentâ la lôr realtât. Ce che però nus pâr, al è che e coventarès une rêt moderne che e fos gjestide benon par puartâ cheste “Italie in minorance” ae atenzion continue dai media e de politiche».
__
Jenfri lis lenghis e lis identitâts che o vês scrutinât no son il furlan e i furlans. Pensaiso che cheste publicazion e podarès vê ancje un secont volum slargjât a altris minorancis?
«E sarès une robe bielone e la nestre disponibilitât e je, ancje pal acet che il prin volum al à vût. Dal Friûl, par altri, nus son rivadis un grum di atenzion e di segnalazions su furlan e rosean, in particolâr. Starìn a viodi. Intant o vin cjapât cun grant interès la partecipazion a Stazione Topolò, un mût par scomençâ a cognossi di dongje la realtât». ❚
Antonella Lanfrit