Un cuadri cjandit, cence sacumis o sfumaduris. Blanc, juste apont, tant che il titul dal ultin spetacul dal Teatri Incerto, ispirât al test Art di Yasmina Reza e produsût dal CSS Teatri stabil di inovazion dal Friûl-Vignesie Julie, che al à debutât ai 21 di Març a S. Vît dal Tiliment e che al à za tacât a zirâ, te suaze de stagjon dal Ent regjonâl teatrâl dal Friûl-Vignesie Julie, cun plenon di public. Dongje dal tercet Fantini, Moretti e Scruzzi, l’element principâl in sene e je propite une tele di art contemporanie che un dai trê, a so dî intindidôr di piture, al à comprât paiantle un voli dal cjâf dome par fâ contente la gnove morose. Di chi, e nas une discussion ferbinte cun chei altris doi che no si ferme al nivel artistic, ma e passe a tamês il leam jenfri i trê, tirant fûr plui di cualchi cadavar platât e metint a risi la lôr amicizie. A dispiet dal titul, duncje, il spetacul nol è vueit di contignûts, ma al tocje sul vîf la crisi des relazions in dì di vuê, cun chê ironie gustose e chês stocadis tipichis dal Incerto. Volêso une prove? Blanc al sarà a ….
di S.F.
