Ce isal restât dal ferment stiçât dal spetacul I Turcs tal Friûl? Il parê dal Teatro Incerto
A son su la sene di passe 35 agns e a resistin ancjemò ben salts, tant che esempli râr di grup teatrâl professionist (par doi tierçs) che al à decidût di scometi su la lenghe furlane e che al à vinte la partide, dant scuasit capot a ogni gnove produzion: in dì di vuê, il Teatro Incerto al è un dai ospits plui spietâts des rassegnis dal Friûl, indulà che al à concuistât il cûr dai spetatôrs, simpri plui numerôs e atents aes dinamichis dai lôr tescj.
Sul palc a puartin lis lôr storiis, scrivintsi di bessôi i copions, che il plui des voltis a fevelin de vite di ducj i dîs, contade cun naturalece e semplicitât, cence però pierdi il pevar e il morbin, cul risultât di un sclopâ di ridadis spontaniis che, dut câs, si tradûs ancje in riflession.
«Clarementri – nus conte il tercet -, te sielte dai lavôrs bisugne fâ i conts cul public e cul marcjât, che al domande spetacui comics. Il nestri al è un pôc un compromès, parcè che no si fermìn ae batude di ostarie, ae barzalete o ae ridade volgâr, ma o cirìn simpri di meti dentri alc di plui profont. Po dopo, la int e pues limitâsi a ridi o resonâi parsore».
«Ca di nô e mancje une educazion dal public, che al è stât usât ae farse par furlan, si che i organizadôrs a promovin dome chê, ancje se il teatri al varès di jessi il spieli de vite e la vite, lu savìn ben, no je fate dome di ridadis», al dîs Fantini.
La cariere dal Teatro Incerto e je leade ancje al spetacul “I Turcs tal Friûl”, che o vin fevelât sul numar di Març da “La Patrie dal Friûl” inviant un dibatiment su la situazion e lis prospetivis dal teatri furlan contemporani, e che al interven ancje il tercet dal Incerto.
Scruzzi: «I Turcs a son stâts pardabon une esperience uniche, che nus à puartât une ricjece straordenarie, no dome in tiermins di cualitât. Pe prime volte (forsit ancje pe ultime), di fat, lis diviersis compagniis a àn vude la ocasion di cognossisi e di lavorâ insiemi. No par nuie, graciis a Elio De Capitani il teatri furlan al è jessûts dai confins regjonâi e al à vût ricognossiments a nivel nazionâl».
Moretti: «Il sucès al jere leât pe plui part ae presince di un regjist forest, che cul so carisme al à rivât a tignî adun tantis realtâts diferentis. E je la dimostrazion che in Friûl o sin une tiere di individualiscj, massime tal mont artistic».
Scruzzi: «Cumò, di fat, nol è restât nuie. O sin tornâts indaûr, a sierâsi tai nestris piçui cjantons».
Fantini: «A son cambiâts ancje i timps. Tai agns Otante e prins Novante al jere dut un ‘siminament peât ae nestre lenghe, cun Radio Onde Furlane, Usmis, FLK, Trastolons… E jere la voie di sperimentâ, di metisi ae prove, cun motivazion e cun impegn».
Moretti: «Al è stât in chel moment che o vin capît la impuartance dal furlan e o vin cjatât la nestre strade. Chei che nus vignaran daûr no varan cheste fortune. O vivìn intune epoche li che no si à timp pe memorie, e chest nol jude cui che al vûl fâ il nestri mistîr».
Fantini: «E je ancje colpe de politiche, che e à volût ridusi il furlan a lengaç di bas nivel, di doprâ dome par stupideçs».
Scruzzi: «O pûr, si ponte dut sui “grancj events”, cence dâ pussibilitâts aes realtâts plui piçulis, spindint une barcje di bêçs par produzions che a son une butade di ecezion. In cheste maniere no si podarà mai abituâ la int a un teatri plui alt».
di Serena Fogolini
