Salmè Sindaco-Udine agli udinesi e Io amo Udine
«Un referendum par domandâ plui autonomie»
Stefano Salmè, 49 agns, al vîf a Padier. Resonîr, al à dât ducj i esams de facoltât dal cors universitari di Storie. Al à scrit il libri “Una certa idea di Udine” e al è stât elet tal 1995 conseîr comunâl. Tai siei impegns politics ancje chel di segretari nazionâl dal moviment politic Fiamma Nazionale. Si presente a Udin cu lis listis: Salmè Sindaco-Udine agli udinesi e Io amo Udine.
1. «Udin e à di recuperâ une centralitât politiche, economiche e culturâl tant a nivel regjonâl che nazionâl. Udin e je dal sigûr la capitâl dal Friûl, intindût tant che regjon storiche, cu lis sôs particolaritâts storichis, culturâls e linguistichis».
2. «La nestre citât e je stade il motôr dal progrès economic e sociâl de regjon. Udin, di buteghe dal Friûl si è trasformade in une grande farie di servizi pal teritori: dal ospedâl, purtrop in declin, ae Universitât».
3. «La Regjon Friûl-Vignesie Julie e je nassude su di un pat no scrit: il Friûl al acetave il cjâf lûc a Triest, ma i presidents a vevin di jessi furlans. Il pat si è rot e par zonte la burocrazie regjonâl e penalize Udin e il Friûl. Se o deventi sindic, prime o modifichi il Statût comunâl par vê i referendums consultîfs e po o ‘nt fâs un par domandâ plui autonomie di Triest, intindude tant che Regjon. O domandarìn competencis e di mantignî in citât il 90% des compartecipazions aes tassis».
4. «La lenghe di un popul e je il so Dna. La globalizazion e riscje di copâ dutis lis identitâts. Par chest, chei che i tegnin ae identitât e varessin di aleâsi, no di fâsi vuere. Dut câs, se o sarai sindic la tutele dal furlan e dal udinês e sarà une prioritât».
5. «Il nestri al è un program metût adun scoltant i udinês: bonus di natalitât pal prin e pal secont fi di 10 mil euros e bonus dignitât par invalits civîi e par chei che a àn la pension sociâl fintremai a puartâle a 600 euro. Chescj bonus si podaran spindi dome cu la “Carta acquisti Udine” e dome tal piçul cumierç citadin».
di Antonella Lanfrit
