Il leghist si impegne a agjî su la pression fiscâl in ducj i setôrs di competence regjonâl par rindi convenient invistî in regjon
Dopo il vôt des Politichis dai 4 di Març, al è dal sigûr il candidât di bati: nol à ancjemò 40 agns (al è nassût a Verone intal 1980) Massimiliano Fedriga, leghist che al rapresentarà dute la coalizion dal Centridiestre aes elezions regjonâls dai 29 di Avrîl, e “enfant prodige” de politiche. Iscrit ae Lega Nord di cuant che al veve 16 agns, al à scjalât i vertiçs dal so partît fin a deventâ, intal 2012, cjâfs grup ae Cjamare dai Deputâts (là che al è stât elet intal 2008, a dome 28 agns di etât).
Se al vignarà elet, ce impostazion pensial di tignî bande il guvier nazionâl sui acuardis Tondo-Tremonti e Serracchiani-Padoan?
O vin di tornâ a negoziâ chescj acuardis, parcè che o vin patide une penalizazion, tra contribuzion direte e chês altris misuris previodudis de leç di stabilitât, di plui o mancul un miliart e 800 milions l’an. Che al vûl dî 1500 euros par ogni citadin dal Friûl-Vignesie Julie, neonâts includûts. Cussì a son stadis di fat comprimudis la autonomie de Regjon, la specialitât e lis competencis, parcè che dut chest al impedìs di meti in cjamp i servizis pai citadins previodûts dal Statût. O soi pront a doprâ ancje lis manieris fuartis in cheste rinegoziazion cul Stât, par evitâ che il Friûl-Vignesie Julie al sedi ridot di fat a Regjon a statût ordenari.
Uti e abolizion des Provinciis: fasaraial une cuintririforme o une semplice manutenzion? Ce asset varano Friûl e Triest? Il Friûl varaial une rapresentance istituzionâl teritoriâl?
Magari cussì no, la struture dai ents locâi individuade di cheste riforme no sta impins. No esistin alore alternativis a riviodint dal dut la impostazion e l’asset. O partirìn gjavant la obligatorietât pai Comuns di aderî aes Uti e lis penalizazions relativis. Dopo, si à di vierzi un confront cui ents locâi, stant dentri di trê pilastris fondamentâi: il prin al è che l’asset istituzionâl al à di garantî ancje la rapresentazion des identitâts e des diviersis culturis dal teritori; il secont al è che si à di tornâ al principi democratic che a son i citadins a sielzi cui che ju à di guviernâ. Tierç, si à di movi competencis di une Regjon incentradore al teritori, lassant al centri dome la funzion legjislative e programatorie, trasferint ai Comuns la part aministrative.
Cualis politichis adotaraial pe tutele e pe valorizazion de lenghe e culture furlane e di chês altris minorancis linguistichis regjonâls? Sostignaraial l’ûs inte scuele e tai mass media, includude la television?
Midiant de lenghe e de storie dal propri teritori si cree e si manten vive une comunitât. Masse voltis i citadins de nestre regjon no san nancje che ce che al è sucedût intal lôr teritori. Lenghe e storie locâl a son fondamentâls, e midiant de scuele e dai mass media – e o pensi soredut ae Rai – a van disvilupadis.
Cemût vuelial rilançâ la economie e il lavôr? In particolâr, cualis politichis par fâ plui competitîf il manifaturîr furlan e par rindi plui trativis pai invistiments lis nestris zonis industriâls?
O vin di agjî su la pression fiscâl in ducj i setôrs di competence regjonâl, par esempli aplicant la fiscalitât di vantaç za previodude dal acuardi Tondo-Tremonti, e dopo fâ une disburocratizazion concrete. Il sportel unic pes aziendis, previodût par leç, nol è mai partît pardabon. O vin di semplificâ, parcè che i coscj burocratics pe imprese a son enormis. E dome la iniziative imprenditoriâl e cree ocupazion: cui che al pense di risolvi la cuistion dal lavôr cui amortizadôrs sociâi al fale. Chês a son misuris di emergjence. O vin di rindi convenient invistî in Friûl-Vignesie Julie par creâ gnûfs puescj di vore.
Cualis politichis proponial pal benstâ sociâl, tacant di chês pe famee e pe natalitât?
Pe natalitât e pes fameis o vin di pontâ in maniere decise sui servizis. Magari cussì no, a son pôcs e tant onerôs, pensìn ai asîi nît. In secont lûc, o vin di struturâ il sisteme fiscâl regjonâl a misure des fameis, duncje modulant i pês fiscâi sul numar dai components di un nucli familiâr. O soi cetant contrari ae politiche dai bonus. No crôt che a coventin e a gjavin risorsis a politichis seriis pe natalitât.
di Roberto Pensa