CULTURE – ART-Â. Un flum di salvâ: un centenâr di artiscj pal Tiliment

Mail art pal Tiliment. Oparis rivadis vie pueste, daûr di un invît de associazion Acqua, il sodalizi ambientalist nassût tal 2001 par tutelâ il flum e l’ambient e difindi la sô naturalitât (viôt «Friûl Ocidentâl, un ambient che al à bisugne di A.C.Q.U.A.» su La Patrie di jugn 2008, n.d.r). Oparis che a fevelin di un flum di salvâ. Prin di dut dal om.
Studiât e preseât di ricercjadôrs di dut il mont, tai ultins agns, di fat, il Tiliment al è stât menaçât di cui che al pense che par comedâ il probleme des diluvions te Basse furlane, a coventedin fats, tal trat di flum jenfri Pinçan, Ruvigne, Sant Denêl, Spilimberc e Dignan, dai vascons di contigniment – lis cassis di espansion –, di mût di sbassâ la fuarce des aghis. Il progjet al è stât contestât di plui bandis, parcè che monumentâl e dibant, di fuart impat sul ambient.
In prime linie, te bataie cuintri lis cassis, e je simpri stade Acqua, che e à puartât la cuestion ai plui alts nivei istituzionâi talians e europeans. Cumò la gnove iniziative, «une idee di grup», al conte Renzo Bortolussi, president dal sodalizi, cognossût pal so ativisim ambientâl, artist ancje lui, artist ecologjist, si podarès dî, stant che lis sôs voris, fatis cun materiâi riciclâts, a passin messaçs socio ambientâi.
Ae fin dal 2008, Bortolussi al à mandât a cetancj artiscj talians e forescj un apel, parcè che a contribuedin, cu lis lôr oparis, ae campagne di sensibilizazion pe tutele dal Tiliment, e tancj – plui di cent – a àn rispuindût. 130 sù par jù, i lavôrs rivâts. Il flum al è bon di grandis sugjestions e emozions, e lis voris presentadis a ‘nt presentin lis tantis musis. Cun tecnichis difarentis: dal acuarel al pastel, de grafiche al collage, ae fotografie. Tra lis oparis presentadis a son tocs poetics, fats cun lirisim e partecipazion, insiemi a berladis cuintri la distruzion, che dispès si compagnin di peraulis, espression dal disdegn che al ven dal profont de anime. Dutis a fevelin di un flum di salvâ, parcè che amât, cul cûr e cul cjâf. Une denunzie cu lis peraulis de art, a voltis sunsurade, a voltis sberlade a fuart. Cumò chestis voris a àn ancjemò plui vôs, in gracie di une coletive itinerante, inmaneade – te suaze di «Abstract VIII edizion – prime manifestazion internazionâl Mail-art» – de Associazion Acqua cul patrocini di Aiap UNESCO Paris/Comitât talian di Puart, Cuadrarie Museu Cras di Spilimberc, Grup zovins pitôrs spilimberghês e di Spazi/art L’Aquile.
Une «propueste gnove», al marche Bortolussi, pensade par «fâ cognossi il câs Tiliment a mestris plui o mancul innomenâts, che a àn manifestât il lôr dissens su lis voris progjetadis, ritignudis inutilis e danosis, là che al è stât dimostrât che la tutele dal ambient al jude a protezi la int plui che i manufats fats sù dal om».
Erika Adami
________________________________________
CE FÂ
Oparis grafichis e tecnichis mistis, ispiradis ae art e ae figure di Pablo Picasso, fatis in ocasion de muart, tal 1973, dal grant artist, di altris protagoniscj de art contemporanie: Salvador Dalì, Joan Mirò, Henry Moore, Renato Guttuso, Michelangelo Pistoletto e Enrico Baj (te foto). Lis voris a rivin dal Sprengel Museum di Hannover e a son in mostre a Vile Manin di Passarian, te esedre di soreli jevât, fin ai 26 di Lui (des 2 daspomisdì aes 7 sore sere, di martars a vinars, e des 10 di matine aes 7 sot sere, di sabide e domenie; lunis sierât). La jentrade ae mostre «Hommage a Picasso» e je gratuite. Informazions al numar 0432/821234 o sul sît: www.villamanin-eventi.it