«E je fiducie di inviâ gnovis ativitâts ancje intun periodi di crisi in plene mont»
A son in tancj che a vuelin fâ i conts inte sachete a Sapade. Soredut in Venit. La voie di dimostrâ che la sielte di tornâ in Friûl-Vignesie Julie e je stade sbaliade e sburte i nestris vicins a cjalâ cu la lent di ingrandiment ducj i disservizis o lis robis che no àn funzionât ben tal passaç di Plodn ae nestre Regjon. Al ven facil pontâ i voi su ce che nol à daurman funzionât come un orloi svuizar, parcè che al è clâr che intune transizion alc che nol va si cjate simpri.
La assessore dal comun di S. Michêl (lei sul numar di Març da “La Patrie dal Friûl”, ndr) nus veve pandût che i siei concitadins a vevin cjapade pôre pes tantis contis di disservizis che si saressin verificâts a Sapade di cuant che il Comun al è furlan: scovacis no cjapadis sù, stradis no netadis, stradis interotis de nêf o di arbui che a colin. Balis, o come che si disarès cumò, “fake news”. Alc al sarà sucedût intai prins dîs dal trasferiment, ma la vite dai sapadins e je continuade come simpri.
Anzit, e je ancje une biele gnove confermade dal sindic Manuel Piller Hoffer: «Passâ di une Regjon a statût ordenari a une a statût speciâl al conven». Dal pont di viste economic al è un vantaç che si pues misurâ in mieç milion di euros di plui. E la Regjon e à prometût di fâ cressi i implants di schi cun gnûfs invistiments. Lis compensazions fiscâls dai 6/10 che la Regjon e ten inte sachete rispiet aes tassis paiadis dai siei citadins a permetin di tirâ flât.
Nol è dut facil, intindìnsi: il lavôr al è tant. Al covente par esempli intal cantin de sanitât inviâ convenzions cu lis aziendis sanitaris dal Venit e la Aas 3 Friûl de Alte e di Mieç par garantî la continuât dai servizis. Ma dì par dì, se a vegnin a creâsi criticitâts, si risolvin cul bon sens. E Sapade e sta cressint. I segnâi? Al à viert un gnûf piruchîr e duncje e je fiducie di inviâ gnovis ativitâts ancje intun periodi di crisi in plene mont. Ma la int di chenti e spere che a rivin i fonts par rilançâ il turisim e par peâ simpri di plui Plodn al Friûl. Ancje se a Belum al è ancjemò cualchidun che al volarès ricori cuintri il passaç di Regjon: fintremai il governadôr Luca Zaia, dut câs, nol à dât mani a chescj resonaments. La partide e je sierade. E il Venit cumò al à molât su Sapade. Almancul par cumò. La bataie forsit e passe su la Regjon interie: intune ipotesi macroregjonâl ancje la cuistion che e rivuarde chest piçul paîs di mont e cjaparès une altre plee.
di Walter Tomada
