CENTRIDRETE
«Cui eletrodots, regjon plui moderne e trative»
Il pordenonês Luca Ciriani, 51 agns, atuâl conseîr regjonâl di Fratelli d’Italia, al è il candidât dal centridrete tal coleç uninominâl di Udin e Pordenon pal Senât. Lis sôs prioritâts? «Fermâ la imigrazion incontrolade e la islamizazion de nestre societât, che e derive ancje di cheste imigrazion incontrolade». Centrâi a son ancje i temis de famee e dal contrast al câl des nassitis. Ma la cuistion che i sta plui a cûr di dutis e je «la definizion di gnovis politichis fiscâls a pro de ocupazion dai zovins, parcè che a vivin une situazion di grant pinsîr, cualchi volte ancje di disperazion».
1 «La autonomie de Regjon e je autonomie finanziarie, se di no no je. Si riscje il dam e la burlade. Il gnûf pat de Serracchiani cun Padoan no mi convinç, parcè che nus risiervarà sorpresis amaris intal avignî in tiermins di riduzion de butade in jentrade, la rimodulazion dai decims e podarès fânus dam. Cjapâ la iniziative di une sô revision e tocjarà in câs ae gnove Zonte regjonâl. In gjenerâl, il pat che si sotscrîf cul Stât nol pues jessi un scheme fis, ma al larès verificât e modulât rispiet aes politichis fiscâls dal Guvier: une cierte politiche fiscâl e pues determinâ la riduzion des jentradis dal Friûl-Vignesie Julie, fasint dificile la gjestion des deleghis assegnadis. O crôt che si vedi di previodi une clausule di difese a pet di un limit minim che no si pues lâ sot te assegnazion dai contribûts».
2 «A esistin sedi leçs nazionâls che regjonâls in materie, al baste aplicâlis e finanziâlis in maniere adate».
3 «Il puart franc di Triest nol va vivût tant che un pericul, ma tant che une grande oportunitât. Il retropuart di Triest, se gjestît cuntune programazion su base regjonâl, al pues jessi bon ancje par ativâ la economie di dut il Friûl-Vignesie Julie. Il puart franc al à di jessi vivût, interpretât e programât daûr de logjiche di un disvilup regjonâl; a son buinis pussibilitâts che chest al puedi sucedi».
4 «Il nestri partît al à proponût un plan di disvilup e di aiût ae natalitât articolât sedi in tiermins economics sedi in tiermins di aiûts di servizis dai asîi nîts cu la defiscalizazion dai prodots dedicâts ai fruts. E je une grande cuistion sociâl chê di judâ la natalitât, massime intes fameis talianis che no puedin permetisi plui di fâ fîs».
5 «Nissune infrastruture e je a impat zero, però sedi la tierce corsie che i eletrodots a garantissin ae nestre regjon di podê jessi moderne e trative dal pont di viste dai invistiments, parcè che cence energjie e traspuarts no si va di nissune bande».