Assumi la direzion da La Patrie dal Friûl al è un privileç, un onôr. E par chest, o ringracii l’editôr, la associazion culturâl “Patrie dal Friûl”, pe fiducie che mi à dât domandantmi di cjapâ sù la incarghe e Dree Venier, che mi à passât il testemoni, pal otim lavôr che al à fat intai ultins agns vuidant il mensîl cun competence e passion sincire.
O ai tacât a scrivi sul nestri sfuei cualchi an indaûr, clamade propit di Venier. Une colaborazion che, dopo cualchi an di lontanance, o torni a puartâ indevant, ancje se intune vieste diferente, cun braùre e entusiasim, e une sensazion particolâr, chê che tu sintis cuant che tu tornis a cjase dopo di un lunc viaç. Tu âs il cûr e il cjâf plens di imagjins, vôs, profums, savôrs, tu âs vivût tantis esperiencis positivis e cualchi delusion, ma tu sês content di jessi di gnûf tal to nît, tra i tiei afiets. Ulisse al podarà viazâ par vincj agns o par simpri e cori su mârs diferents, parcè che tal so cjâf e je simpri Itache tant che pont fer dulà tornâ. O varès gust che La Patrie dal Friûl e fos un pôc la Itache dai furlans: un puart sigûr, un lûc che ti da acet, une cjase, chê che ti identifiche e ti rapresente, li che a son lis tôs lidrîs e par chest uniche e speciâl, di vê cure di jê.
La Patrie dal Friûl – tai siei passe setante agns di storie – e à contât il Friûl e pocât i furlans. E continuarà a fâlu, cun onestât e sens di responsabilitât, cun spirt critic e indipendent, simpri te nestre lenghe mari. No sarà la puartevôs di nissun, se no dai interès di une tiere cuntune culture e une storie che la scuele no insegne, ma che si à di jessi cetant braurôs, une tiere vierte a ducj, che e vîf ad implen la contemporaneitât e ogni dì e je clamade a metisi in zûc par fâ il so doman.
Fuarte di un grup di colaboradôrs straordenaris e cuntune vieste grafiche gnove, la Patrie e cirarà di stiçâ riflessions su chel che al sucêt tal nestri Friûl e di proponi ideis, ufrint un contribût pe sô cressite e pe cressite des diviersis comunitâts che lu componin, tal rispiet dai lôr dirits e scoltant lis lôr dibisugnis. Un impegn che no pues lassâ di bande la promozion dal pluralisim linguistic e culturâl, che al è aes fondis de autonomie regjonâl, di valorizâ pe sô impuartance e unicitât. Insiemi, e cul vuestri supuart, o lavorarìn par un Friûl plui furlan.
Erika Adami
