Missus al torne in Patrie just pal Avent

A torzeon dut l’Istât e l’Atom, il film Missus di Massimo Garlatti-Costa, produsût de Raja Film e Belka Media, al è stât une vore preseât in ducj i lûcs indulà che al è stât proietât. E dopo vê traviersât il stivâl al torne a cjase, propit tal moment dal Avent. Nuie di miôr e di plui imbrucjât. Il Missus Tour, come che al è stât clamât, al à fat zirâ il film – che al conte la bataie dai predis di Glesie Furlane, che a scombatin cun dignitât e fermece par podê permeti a ducj i furlans di preâ, di dî messe in lenghe furlane -, al è stât di l’istât intes comunitâts di lenghe minoritarie dal sud Italie: griche, arberesche e francoprovenzâl, tra Pulie, Calabrie e Sicilie. Di pôc invezit al è stât presentât inte Universitât di Parme, ospits ancje de comunitât linguistiche ladine, la Union di Ladins, a Trent e Val di Fasse.
«Un gran biel zîr – nus dîs il regjist Massimo Garlatti-Costa -. Un viaç che al à regalât grandis sodisfazions, in particolâr e je stade fuarte dapardut la sensazion e la conferme che cui al à viodût il film, ancje se no furlan o crodint, al à capît e poiât il sens de nestre cause. Une grande solidarietât, soredut di bande des comunitâts minoritariis».
A sostignî il progjet dal film, in plui di Glesie Furlane, in particolâr inte promozion, e je stade l’Associazion LEM Italie (Lenghis de Europe e dal Mediterani), une realtât impuartante formade di une rêt di comitâts sientifics che si dedichin a studis comparâts su lis lenghis minoritariis, e ben cuatri universitâts: la “Federico II” di Napoli, la Universitât di Teramo, la Universitât Francofone de Italie dal Sud e la Universitât di Parme. Missus al à puartât di fat tant interès ancje di bande dai students, che a ogni ocasion no si son tirâts indaûr tal fâ tantis domandis. No mancjaran pal film lis partecipazions a concors, come al Babbel Film Festival di Cagliari.
Tornât in Patrie, tal mês di Dicembar il film documentari al sarà proietât in ocasion dal Festival Suns Europe al Teatri di Udin e ai 10 in Domo a Vençon. Dutis lis informazions su lis prossimis datis sul sît missusfilm.com.
✒ Alessio Screm