COGNONS DAL FRIÛL

Midiant de storie dai cognons furlans, si fâs ancje la storie dal nestri Friûl. Chest mês us proponìn 3 cognons che no si disarès, ma a àn divignince slovene. (Gjavâts fûr di I cognomi del Friuli di Enos Costantini e Giovanni Fantini ed. La Bassa/LithoStampa. O ringraciìn i autôrs pe disponibilitât e pe colaborazion).
GOLLES
Dal adietîf sloven gol cun –ez al è vignût fûr il cognon Golez, che al ven scrit Golles.
Gol par sloven al vûl dî “crot, dispueât, spelât, coçon” e duncje in origjin si sarà tratât di un sorenon di un cun pôcs cjavei.
Al è un cognon tipic di Stermizza, tal comun di Savogne.
1314 Danielis dicti Golic in Carnia; 1321 Antonij filij Goleçan a Cividale; 1381 Jurius dictus Goliç a Cividale; 1612 Grigor Goles de Starmaz; 1651 filius Lucae Goles de Stermiza.
SITTARO
Al derive, cun le zonte di –ar, dal sostantîf sloven sito “tamês”. Facil che al sedi stât il sorenon di un che al faseve draçs. Tipic dal comun di San Pieri dai Sclavons, si cjatilu ancje a Azide e Vernâs.
1643 Rev. Martinus Siter curato di Volzana scrive al Patriarca d’Aquileia:… à me è impossibile in questi asperi monti, dar Sufficiente pabulo Spirituale à tante anime Sottoposte a questa mia Cura, per tanto ripresento Joanne Velicognia a V. Ill.ma et Rev.ma Supplicandola humilmente resti gratiata di habilitarlo al resto dei Ordini Sacri Senza ulteriore interstitio a fine Vengano Suffragate anime et io disgranato della anscianza et Solevato di Si grava Stra Ordinario Peso…
SCOZIERO / SCOZZIERO
Cognon documentât a Cividât fin dai prins dal Sîscent, si cjatavilu ancje a Sorzint e, in dì di vuê, al è une vore presint des bandis di Cjaurêt, sot la forme slovene di Skocir.
Di fat, al derive propit dal verp sloven skociti che al vûl dî “saltâ”, che al vignive une volte doprât ancje come sostantîf fevelant di personis une vore piçulis di stature e che a jerin puartadis a vê dispès scats di gnervôs.
1501, 28 dic. Gasparino Scocir q. Mattia di Sorzento vende per 50 duc. livello 5 St. fr. al nob. Franc. q. Federico de Portis; 1692 Jseffo Scoccier di Cividale, lavorante di bottega di D. Carlo Brusandola, teste in docum. della Fraterna del SS.mo Rosario di S.Pietro Schiavoni.