Une storie di migrazion al contrari, un film cun protagonist il Friûl: La donna di picche di Renzo Sovran

Al è stât zirât dal dut in Friûl, di precîs a Taurian di Spilimberc e a Cjiscjerne di Cosean, il film di Renzo Sovran La donna di picche, produsût di Flavio Zanello cun The Box records par Zerozerobudget, e presentât in prime assolude al public dal Cinema Visionario di Udin ae fin di Setembar. Dut esaurît par cheste prime esperience di luncmetraç firmade dal regjist furlan Sovran, che al à otignût un grant sucès e tante stime di bande dal public, calorôs e apassionât de storie, tant di regalâ a dut il cast presint in sale batimans tant luncs ae fin de proiezion.
Tra il dramatic e il comic, il film al conte di une storie di amôr vivude in Friûl intai agns Setante, prime dal taramot, di precîs tal ’74. Il teme al è chel simpri atuâl de migrazion, cul protagonist Tommaso (interpretât benon di bande di Lodovico Rigonat, tra l’altri biele vôs dal Côr Polifonic di Rude), che al è tornât in Friûl de Belgjiche cu la sûr, e nol rive adore a reinserîsi ben tal paîs de sô origjin. Cuarante agns, operari di fabriche, un om cidin che al ame la scriture e che al è un fenomen tal zûc dal flipper, al cognòs une zovine studentesse triestine, Serena (interpretade di une brave Betty Maier), che e rive a Taurian a lavorâ di Istât li di so barbe ostîr, par une punizion volude dai gjenitôrs.
Tra i doi e nas une storie di amôr, cetant comentade in paîs, popolât di varis personaçs che a vegnin fûr tant che caricaturis: il sindic, il predi, il sorestant de fabriche, il mat di turni, i paisans, par une liende contade par talian, dulà che però no mancjin diviersis espressions dutis furlanis, che e dan ae storie une aderence complete ae storie e ai lûcs. Il finâl no si pues dî, ma la liende e je biele, ben contade e zirade, di tignî incolât il spetatôr par dutis lis dôs oris de sô durade.
Un film che al merete di jessi viodût, in particolâr di bande dai furlans ator pal mont e di chei che dopo tancj agns passâts tal forest a son tornâts in Patrie. Al conte di lôr e ancje di chei che a son invezit restâts. La donna di picche al vignarà proietât in varis salis dal Friûl fin sot Nadâl e la sperance e je che e si slargji ancje tai varis Fogolârs Furlans sparniçâts tal mont.
✒ Alessio Screm