Pre Antoni al viôt il so jessi lât predi come une predestinazion, cuasi une strade obleade che al scugnive passâ par li. E lui ancje dopo, cundut ce che al à passât, al à simpri dit che no si sarès viodût a fâ nuie altri che il predi, o miôr, il plevan.
Pre Roman
‘Condanât’ a fâ il predi
Cheste presince (dal Signôr) vere ancje se misteriose, reâl ancje se no percepide, preventive e puntuâl ancje se capide plui tart, e je rafigurade une vore ben tun pas de Bibie. Mi riferìs ae storie dal profete Elie, contade tal prin libri dai Rês. Elie, cjapât des sôs lotis cuintri de idolatrie, al brame di viodi Jahvè. Il Signôr i fâs il regâl di palesâ la sô presince e assistence passant denant di lui. Dome che lui, come che al dîs il libri dal Esodi, nol pues viodi Diu e restâ in vite, cussì il profete al va a platâsi tun landri. E Diu al passe. Prime al rive un grant burlaç di scjassâ lis monts, “ma il Signôr nol jere tal burlaç” (1 Re 19, 11). E nancje tal taramot, capitât subit dopo. E nancje tal fûc, ma tun aiarin lizêr lizêr. I esperts a fevelin di un cidinôr sutîl sutîl come un aiarin. Elie si tapone la muse cu la manteline e si ferme su la jentrade dal landri. Nol à viodût il Signôr in muse, ma lu à viodût in schene o, miei, al à viodût il daûr di Diu. Nô o disaressin, cun dut rispiet e cuntune antropomorfizazion, il cûl di Diu. Che al significhe une imagjin une vore concrete. L’om nol pues viodi Diu in muse, vadì par denant, prime che a capitin i fats, ma dome par daûr, vadì nome dopo che a son sucedûts. Di fat, inte mê rubriche de Vite Catoliche “Cirint lis olmis di Diu…”, no cîr là che Diu al à di passâ, che no lu sai nancje jo, ma là che lui al è passât e al à lassade la sô olme.
La man de provedence, la assistence dal Signôr, la presince di un agnul che mi compagnave e mi diseve ce strade cjapâ le ai sperimentade milante voltis. O disarès che il Signôr al à volût dâmi un segnâl di predilezion ancjemò prime che o nassès. Mê mari, pôcs dîs prime di parturî, si è insumiade che, denant dal altâr de Madone di Lourdes che o vevin in domo fin al taramot, sul prin scjalin al jere inzenoglât un frutut biont, cu la toniute di predi. Mê mari, come sô mari, e veve une sensibilitât e un don particolâr pai siums. Di fat, jal à contât a une sô amie e comari e chê mal à contât cuant che o jeri za predi e duncje dopo che il fat si jere realizât. Pe precision, no dome o soi lât predi, ma o soi nassût ai 11 di Fevrâr, la dì che la Madone i à comparît a Lourdes a sante Bernardete Soubirous. O varès di zontâ, par onestât, che no soi l’unic mascli, ma il tierç e che chei altris doi fradis a jerin ducj plui adats di me a frontâ cheste strade.
Une strade che mi somee predestinade, come che o fos stât condanât, in sens bon, a fâ il predi. No vevi salût ma o ai rivât simpri a meti blecs. No vevi une palanche e Diu al à proviodût juste un moment prime che si sierassin inesorabilis lis puartis dal seminari par vie de nestre “morositât” finanziarie. La providence si è servide di un siore vedrane e devote, siore Meneute De Bona di Cjasegnove di Tierç, che si è visade di une promesse fate di sô sûr a mê mari vincj agns prime e mi à consegnât i bêçs – 200.000 francs! – di une cjase che e veve vendude. O vin parât jù cualchi coni di chei grancj che o vevin fat in ocasion de ricostruzion de cjase bombardade, mi soi comprât dut il furniment pal seminari e o ai podût paiâ il prin, 56.000 francs. O sin dal 1952, prime di chel boom che a cjase nestre nol è mai rivât. A pene scomençade la salide viers l’altâr (o il calvari), gno fradi al partìs cui Fradis Mariscj e mi puarte vie dute la robe. Mi cjati, a bot e sclop, cence nancje une cjamese. Suspîrs e berlis di mê mari, blestemis di gno pari, aviliment e pôre de bande mê. Ma si vierç ancjemò une puarte. Un zovin di Vençon al partìs pal Canadà e al compre, si sa, dute robe di sest. Sô mari e sint mê mari, i fâs dûl e mi consegne a mi dut ce che so fi al veve dismetût. Al veve cuatri agns plui di me e lis misuris a jerin sul cressi, ancje pal fat che jo o jeri minudut, ma intant o ai cumbinât.
Pre Antoni Beline