Al podarès someâ che no vedin nissun gjenar di rapuart, ma il risultât dal referendum in Venit e i atacs al sisteme de Regjon F-VJ a segnalin concomitancis pericolosis.
✽✽ Chê plui macroscopiche, naturalmentri, e je chê di ecuiparâ il prossim nivel istituzionâl de Serenissime a chel de specialitât. Tentatîf di realizazion dificil intal imediât, viodût il detât costituzionâl, ma che al met lis basis par une rinovade prove di macroregjon. Par passâ di fat il scoi, la anession de bande di Vignesie des confinantis speciâls Trentin e Friûl-VJ, e podarès rapresentâ il rimandel di doprâ.
✽✽ Chel altri pericul al è rapresentât dal assalt sintomatic a cualchi setôr regjonâl strategjic. O fevelìn de scjalade, dute cuvierte, al sisteme traspuarts de bande di societâts, dutis in cualchi mût leadis a Ferrovie dello Stato, la stesse aziende che si è metude di traviers intal bant pal traspuart public locâl, impedint cui siei ricors ae cuardade furlane la gjestion dal stes.
✽✽ Cui che ancjemò une volte al reste fûr di chestis manovris al risulte il puart di Triest, simpri plui svincolât dai destins dal Friûl e proietât intune logjiche che e cjale in maniere esclusive al interès de citât juliane, dal so teritori ristret. Altri che teritori daûr dal puart e disvilup pes impresis furlanis.
✽✽ Sul plan de rapresentance politiche il Rosatellum, dal non dal senatôr triestin dai PD Rosato, al rint cuasi une barzalete la pussibilitât democratiche de bande des minorancis linguistichis di podê elei un propri rapresentant, in barbe ae lôr tutele.
Chi e esist, viodudis lis barieris previodudis, une sole pussibilitât, ven a stâi chê di un grant riviel de bande dal popul furlan al strapodê dai partîts talians e il vôt di masse a un candidât autonomist.
Dificil ciert, ma no impussibil.
✽✽ Insume, cheste legjislature fine de zonte Serracchiani no dome nus lasse lis ruvinis di chês che ur disin riformis de sanitât, vuê in maniere clare sot acuse de bande di dute la classe mediche e dai pazients, une division nefaste de unitât dal Friûl cun chês Uti che a son daûr a dimostrâ dute la lôr pocjece e inutilitât, ma ancje un vueit pericolôs di valence sul plan de politiche nazionâl.
✽✽ Par fortune che o vevin di pesâ di plui in graciis dal rûl de governadore dentri dal so partît.
Salacor no conte plui nuie jê, e nancje il Pd nol scherce. ❚
✒ Dree Valcic
