Paîs Basc: l’euskara al cres

Tal mês di Mai i guviers de Comunitât Autonome Basche e de Navare, intune cul Ufici public pe lenghe basche (Euskararen Erakunde Publikoa), a àn presentât i ultins dâts de seste inchieste sociolinguistiche sul stât de lenghe basche, ven a dî chei dedicâts a Ipar Euskal Herria, la part sot aministrazion francese, e chei complessîfs par dute la aree basche.
Intai Paîs Basc francês, tra il 1991 e il 2016 il numar dai euskalduns, chei che a fevelin par basc, al è cressût di un miâr di personis ancje se, cul aument gjenerâl de popolazion, la percentuâl si à sbassade. Il dât miôr al è chel dai fantats jenfri i 16 e i 24 agns, là che i euskalduns a son cressûts dal 1%, a dimostrazion di une inversion di tindince tra lis gjenerazions plui zovinis.
Se si cjalin invezit i dâts gjenerâi dal Paîs Basc, intai ultins 25 agns lis personis in stât di fevelâ par euskara a son passadis dal 22,3% al 28,4%. Chei che lu doprin par solit a son però il 25,7%: tal 10,3% dai câs plui dispès che no la lenghe dal stât, tal 6,2% in proporzion similâr e tal 9,2% cun mancul frecuence che no spagnûl o francês. Lis personis che a vuelin che la lenghe e sedi promovude a son il 55,8% (rispiet al 47,5% dal 1991) e i contraris a son lâts jù al 16%.
✒ internazionalitari.blogspot.com