NO SON PERAULIS PAR VECJOS. Hype (ma ancje Keynote)

Mandi nono!
Mandi frute! Ce stâstu cjalant tal computer, un film?
No, nono, al è il keynote de Apple!
Un chinot? Si cjolie tal computer ancje chel, cumò? Jo o ai miôr lâ a bevilu tal bar.
Il keynote, nono. E je une conference fate cun ducj i gjornaliscj e i blogger par presentâ alc.
E ce presentino?
Il gnûf iPhone, nono! A àn fat un grum di hype tai ultins timps, o soi propite curiose.
Un grum di ce?
Di hype.
Viôt tu lis modis: une volte aes conferencis si fasevin i buffet cui volovàn (viodistu che o cognòs ancje jo peraulis forestis?). E cumò invezit ju fasino mangjâ tal laip, i gjornaliscj?
Ma no laip, nono: hype! Al ven dal inglês, anzit, dal american. Si fevelave di hype cuant che cualchidun al jere sù di suste.
Come cjoc?
Si, par esempli. E cumò si dîs “hype” ancje par fevelâ di cuant che une aziende e tire sù di suste un prodot, e met curiositât, lu sglonfe tant, e dîs alc cence dî masse, di mût che ducj a stedin in spiete di viodilu.
Un pôc come cul Nadâl. Vincjecinc dîs di Avent, e dopo e je simpri la stesse robe: doi dîs di mangjâ e bevi e cuatri par digjerî.
Alc dal gjenar, sì. Nome voltât in publicitât, par alc di vendi. A àn tacât l’an passât a mandâ fûr vôs e peteçs su chest telefonut: lis funzions, la batarie, la fotocjamare…
E la int ur sta daûr un an intîr par sintî di une batarie?
Cun dut ce che a rivin a meti in pîts cu la comunicazion, sì.
Al à di rindi, chest telefonut, par rivâ a paiâ un an di publicitât!
Sigûr, nono: lu vendin a votcent, nûfcent euros!
Cumò o ai capît parcè che lu clamin laip: parcè che lis aziendis i mangjin simpri parsore!
Dut câs, e funzione: ancje jo o soi chi a cjalâmi la presentazion, mi àn metût curiositât.
Sì, ma no si fâs cussì, però.
Parcè po, nono?
Cuntun telefonut di votcent euros a varessin di dâ champagne, o almancul un pôc di prosec, a chei puars gjornaliscj. E invezit dome chinot e mangjâ tal laip! A saran ancje brâfs a comunicâ, ma ce cragnins!
✒ Bete Di Spere