COGNONS DAL FRIÛL

Midiant de storie dai cognons furlans, si fâs ancje la storie dal nestri Friûl. Tancj a son chei che a vegnin fûr dai mistîrs, ma cualchidun al è mancul facil di induvinâ. Chest mês us proponìn sîs cognons curiôs. (Gjavâts fûr di I cognomi del Friuli di Enos Costantini e Giovanni Fantini ed. La Bassa/LithoStampa. O ringraciìn i autôrs pe disponibilitât e pe colaborazion).
FALZARI
Non di mistîr di cui che al fâs falcets.
Si cjatilu a Marian e Monfalcon. 1439 m.° Antonio Falzario q. Silvestro di Segnacco; 1465 magn. Nicolao falçario q. magn. Stefani de Lestano; 1516 m.° Gio Barbano falzario di Tarcento q. Leonardo falzario
GRAMOLA
La gramule e jere un imprest par fruçâ la cjanaipe e, par estension, al è deventât sinonim di mastiâ.
Duncje un non di mistîr o stranon. Sec. XIV Benvenuta uxor Gramule a Udin; 1485 Olim Ser Joh. Danielis de Gramulins a Pordenon; 1661 Ser Paolo q. Leonardo Gramolano
PIVIDORI/PIVA/PIUSSI
Non di mistîr dal sunadôr di cuarnemuse o pive. Cussì a Cividât tal 1380: Per dispegnà la quarnamusa di Yacugl pividor…
1407 a Udin Francesco Chiaranda pividor. 1426 Grivor fiol del Pividor de Conars a Cividât. Cognon dal Friûl centrâl: une vore presint a Tresesin, Udin, Pagnà, Reane. Si cjatilu ancje a Rivis di Arcjan, Cjassà e Nimis.
CIMADOR
Il cimadôr al jere chel che al gjavave il pêl al panzel o che lu staronzave. Duncje al faseve la cimade.
Un Micolau Cimidor documentât a Cividât te metât dal Tresinte. A Udin 1425 Matie çimador e tal 1439 mestri Fillip zimador.
Cognon di Gardiscje e Udin.
GUATTO
Come non di mistîr si pense al gue, o ben ucefuarpiis. Culchidun al pense ancje a vuat o cuat, duncje cidin.
Cognon che cumò come cumò si cjatilu a Talmassons, Pucinie, Bertiûl e Udin.
1451, 5 ott. Giacomo de Vuat q. Tommaso di Rivolto, in lite con Mattiusso di Rivolto che aveva arato due suoi campi; 1501, 11 ott. Gaspare d.° Guat (o Vuat) q. Nic. Songa da Bertiolo.
CRAMARO
Al ven di cramer o cramâr, peraule di origjin gjiermaniche par dî marcjadant ambulant. 1296 Danilino Cramario a Gemona.
1301 Jacobi Cramarij a Civitate; 1468 Nicolao nominato Cramer de Amaro.
Vignut filg Nicolo Cramar documentât a Glemone tal 1350.
Presint a Lusevare e Taipane.