Il Tiramisù e chês altris tutelis pai nestris prodots alimentârs tradizionâi

Il Tiramisù al è stât ricognossût tant che prodot tradizionâl dal Friûl-Vignesie Julie. Il dolç, che al à fat il zîr dal mont, al è stât metût dentri, su domande de Regjon (cuntune istance che e rivave de delegazion di Udin de Academie Taliane de Cusine/Accademia Italiana della Cucina), inte liste dai Prodots agroalimentârs tradizionâi/Prodotti agroalimentari tradizionali clamâts ancje PAT, e ricognossût tant che carateristic dal teritori. Cuntun decret dal Ministeri pes Politichis agriculis, alimentârs e forestâls e je stade inzornade la liste nazionâl dai prodots agroalimentârs regjonâi, cul dolç intes sôs versions storichementri origjinariis dal Friûl: chê cjargnele, cognossude tant che Tiramisù o Tirimi sù, un tai al mascarpon nassût a Tumieç intai agns 1950 intal albierc ristorant Roma; e chê bisiache, semifrêt inte tace cognossût tant che Coppa Vetturino Tìrime su, nassût simpri tai agns ’50 te Tratorie al Vetturino di Pieris, in provincie di Gurize.
I prodots certificâts tal teritori dal Friûl a son: il persut crût di Sant Denêl DOP, il formadi Montasio DOP, la Broade DOP e il persut di Sauris IGP. La tipicitât dai prodots locâi e je une ricjece massime pai abitants de Regjon: lis robis di mangjâ e di bevi tipichis dal teritori a son il risultât di une culture milenarie che e rapresente une identitât particolâr (a son chei prodots che a vegnin fûr di tradizions contadinis e des monts). Pai turiscj, invezit, i prodots agroalimentârs tipics locâi, prime di chei de cusine, a son il mieç pui facil e economic di scomençâ a cognossi la culture di un popul e la sô tiere, e di insiorâ la anime.
Il Tiramisù e i PAT a son chei prodots ricognossûts dal Ministeri pes Politichis agriculis, in colaborazion cu lis Regjons, dulà che metodi di lavorazion, di conservazion e di stagjonadure a son fats intun teritori, in maniere omogjenie cuntune procedure tradizionâl, par un timp continuatîf di almancul 25 agns. Chest certificât al ricognòs il non e la esistence, al met in lûs la apartignince storiche a un teritori e al smire a un ricognossiment pal avignî ancjemò plui impuartant: la strade pe regjistrazion europeane DOP/IGP. In Friûl-Vignesie Julie al è il câs de Broade, che e à vût il ricognossiment DOP, e de Pitina cu la domande di regjistrazion IGP su la taule de Comission Europeane a Brussel.
Si fevele de tutele ancje pe denominazion dal frico, plat rapresentatîf regjonâl che al à bisugne di jessi difindût dal marcjât forest. La pitance sauride e je un prodot storic, come che a testemoniin documents de Ete di Mieç, e al ven realizât cun ingredients dal teritori, cuasi ducj che a àn la tutele des origjins. Il probleme al che vuê cui che al vûl al pues produsilu, che e sedi une aziende cinese, siciliane, olandese o taliane (come il câs di une dite di Brescia che e vent une tipologjie di snack crostulin). Dut chest al inflame la polemiche e tocje cirî di fâ alc al plui prest: il plat al à di jessi tutelât. Une tutele che devente urgjente, stant che a New York – notizie dal mês passât – un zovin chef al sta fasint il Frico cul ‘cheddar’ (un modonut di formadi doprât tai Paîs anglofons che il colôr al tire sul narançon, ndr) e cu… lis sioris! Diu nus vuardi!
di Sara Palluello